De uèi, 29 d’octobre a mieidia a deman 30 d’octobre a una ora (pr’amor deu passatge a l’ora d’invèrn) se debanarà sus la telaranha la dusau edicion de las “24 oras d’occitan”. Ongan, aqueste “web eveniment” se trobarà sancèrament sus la tela. Calerà pas que de’s botar sus la pagina dedicada per seguir lo programa que promet d’estar ric.
 
Cada dètz minutas (au minimum) apareisharà una navèra vidèo relativa a la creacion en lenga occitana, que sia literària, musicala, teatrala o informativa. Per balhar un petit abansgost de çò que serà perpausat, podèm citar los noms deus “istorics”: Martí, Padena, Rosina de Pèira, Nadau, Jacmelina, Mans de Breish, Patric, e deus mès actuaus coma: Lo Dàvi, Cocanha, las Mondinas, Aqueles, Arnaud Cance, Du Bartàs, etc …
 
Solide, las vidèos seràn vesederas encara un bon moment mès tard. Serà la purmèra pèira d’un projècte mès bèth que’s perpausarà d’estar una veirina complèta de tot çò que’s hè en occitan dens totis los maines.
 
Segon Joan-Marc Leclercq, president deu Bolegatoish e secretari de l’IEO de Garona Nauta qu’organizan l’eveniment (tanben colaborator deu Jornalet), la formula 2016 e tanben un ensag. L’an passat, las 24 oras a l’Ostau d’Occitània a muishat que podon amassar monde, mes sus una jornada sancèra, tot aquò sembla diluit per moments.
 
De mès, la volontat d’una visibilitat mès grana es fòrta, e la telaranha sembla l’utís ideau pr’aquò. L’an que veng, podèm pervéser una mescla de causas programadas e d’espectacle vivent, gràcias a aplicacions coma Face Book e Periscop per exemple.
 
 Vesitatz la pagina Facebook d'Òc around the clòc.
 
 
JML