La presidenta de Taiwan, Cai Yingwen (sovent apelada internacionalament "Tsai Ing-wen"), a refusat la proposicion del president de China, Xi Jinping, de reünificar l’illa amb l’estat chinés. Xi aviá dich que caliá una reünificacion pacifica, mas en prometent de “renonciar pas a l’usatge de la fòrça” e en se “reservant l’opcion de prene totas las mesuras necessàrias”, çò menacèt lo cap del poder executiu chinés, segon l’agéncia oficiala Xinhua.
 
Cai respondèt, net e clar, que la majoritat dels taiwaneses sostenián pas lo principi chinés d’”un país, dos sistèmas”. En mai d’aquò, afirmèt que Taiwan acceptariá pas jamai lo polemic Consens de 1992, tanben apelat Consens d’una sola China.
 
Dins aquel sens, Cai demanda a China que reconesca la Republica de China —nom oficial de Taiwan—, que respècte las valors de democracia e libertat, que tracte d’un biais pacific e equitable las diferencias entre los dos païses e que decidisca de negociar amb lo govèrn taiwanés. Aqueles “quatre critèris” son per Cai “la basa clau pel desvolopament positiu de las relacions a travèrs de l’estrech”, segon l’agéncia oficiala CNA.
 
 
Un estatut unic en politica internacionala
 
Taiwan a un estatut unic en politica internacionala. Oficialament, lo govèrn de Taibei ditz, dempuèi 1941, qu’es lo govèrn legitim de China tota e es reconegut coma tal per vint estats del Mond entièr. Pasmens, en practica, Taiwan es un estat independent, amb una granda estabilitat economica e politica e un poder militar remarcable. Ça que la, l’independéncia de Taiwan s’es pas jamai mesa sus la taula formalament perque la Republica Populara de China considèra que Taiwan es una partida de la China s’opausa de tot en tot a son independéncia.
 
Taiwan a una estenduda de 35 801 km2 e una populacion de près de 23 milions d’abitants. Taibei n’es la vila principala e la capitala.
 
 
Un conflicte dempuèi 1949
 
Taiwan e China son en conflicte territorial dempuèi 1949, quand lo govèrn chinés nacionalista s’exilièt dins aquela l’isla après lo trionf del Partit Comunista dins la guèrra civila e la proclamacion de la Republica Populara de la China sus la partida continentala de part de Mao Zedong. A comptar d’aquel moment, los dos estats chineses demandan d’èsser reconeguts coma l’unic govèrn legitim de China. Amb lo temps, la China continentala a evoluit devèrs lo capitalisme en mantenent lo sistèma de partit unic al poder mentre que Taiwan evoluissiá devèrs un sistèma multipartidista.
 
Lo polemic Consens de 1992 reconeis que i a qu’una sola China e los dos camps o reconeisson aital, malgrat qu’o interprèten de biais diferent. La China continentala se revendica coma l’unic estat chinés, del temps que Taiwan revendica sa legitimitat anteriora a la guèrra civila.