La
Confederacion Païsana a fach aqueste dimars una accion de protèsta a Montans (Galhaqués) contra la lei relativa als Certificats d'Obtencion Vegetala (COV). Amassa amb de representants d'EELV, exigisson l'abrogacion d'aquela lei. S'agís, amb aquela accion, de plantar de semenças de bòrias.
"Dempuèi totjorn, los païsans produsisson, escàmbian, semenan la lor semença e multiplican las lors plantas", çò ditz la Confederacion Païsana de Tarn, qu'a convocat a 14h una protèsta en çò de Philippe Maffre, a Montans (Galhaqués). S'agís de plantar simbolicament de semenças de bòrias e de denonciar aquela lei.
Lo 28 de novembre de 2011, l'Assemblada Nacionala francesa adoptèt la
lei relativa als Certificats d'Obtencion Vegetala (COV). Aquela lei autoriza la semença de granja per 21 espècias solament, en escambi de royalties, e enebís la grana de totas las autras espècias. Segon lo sindicat païsan, "aquela lei se trufa d'un drech ancestral e d'una libertat fondamentala reconeguda internacionalament, en tot metre en perilh l'autonomia de las bòrias".
Aquela afirmacion es tanben partejada pel comunicat de premsa del Grop Euròpa Ecologia-los Verds (EELV)
que sosten la protèsta. Guillaume Cros, president del grop, afirma que "per l'adopcion d'aquela lei son priviliegiats un còp mai los lobbies de l'agricultura industriala en detriment dels païsans". Los ecologistas sostenon las revendicacions de la protèsta e demandan tanben l'abrogacion de la lei. Guillaume Cros e Marie-Françoise Vabre, conselhièrs regionals d'EELV, seràn presents a l'accion.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari