Diluns e dimarts passats, qualques milièrs de personas ocupèron l’autoestrada A9 sul ponch de la frontièra estala entre Catalonha Nòrd e Catalonha Sud. La clau del succès d’aquela protèsta foguèt la collaboracion dels nòrd-catalans. De fach, la solidaritat dels ciutadans d’aquel país catalan situat dins l’estat francés foguèt tanben essenciala la reüssida del referendum del 1r d’octòbre de 2017: sens aquestes, d'efièch, las autoritats espanhòlas aurián confiscat las urnas e los bulletins de vòte. Ara se ten suls rets socials una campanha per que se torne aquela solidaritat, e que los ciutadans de Catalonha Sud ajuden lo nòrd.
 
Aquela campanha demanda als sud-catalans que fagan de torisme en Catalonha Nòrd per participar al melhorament de l’economia que lo centralisme parisenc a fach venir paura. Se demanda de descobrir l’agricultura locala, los vins e los petits productors locals e far de torisme dins d’ecogitas en tot evitar los megacampings.
 
Tanben se sollicita que totòm vesite los musèus del país en exigir que los servicis e las vesitas guidadas se fagan en catalan.
 
Las associacions son pereu pregadas d’organizar d’escambis nòrd-sud, e las escòlas de far d’escambis amb las escòlas publicas bilinguas e amb lo ret d'escòlas associativas catalanas La Bressola.
 
En mai d’aquò, se prepausa una lista d’establiments ont s'aculhís los clients en catalan.