Bandièra01 capçalera  1180x150: Novestivada

Actualitats

Peró: la primèra tèsi doctorala presentada en lenga shipibo defend lo desvolopament de las femnas indigènas

Jovita Balarezo a presentat sa tèsi per obténer lo títol d’ensenhaira bilingua interculturala. O a fach amb sa lenga mairala en revendicant sos dreches lingüistics

| UCSS
Jovita Balarezo es una femna de la nacion Shipibo-Conibo especializada en educacion basica bilingua interculturala. Per obténer lo títol d’ensenhaira, presentèt sa tèsi en shipibo, una lenga parlada dins l’Amazonia peroviana. Obtenguèt la qualificacion de Cum Laude, çò es una mençon onorabla.
 
La tèsi tracta la “formacion professionala e lo desvolopament de las femnas indigènas dins l’Universitat Catolica Sedes Sapientiae”. La tèsi conclutz que las femnas pòdon aténher una creissença professionala se l’administracion publica e las institucions privadas trabalhan ensems. Ça que la, i a totjorn de trabalh de far: “La Glèisa a totjorn sostengut los pòbles originaris, mas l’estat o a fach plan pauc”, çò diguèt. “Nosautres non pensam pas d’un biais individual mas en comunautat. E çò que volèm es demostrar que nòstre pòble desira de contribuir al desvolopament del país. Mas per o far cal totjorn eliminar fòrça barralhas”, çò precisèt.
 
Jovita Balarezo a beneficiat d’un programa de l’Universitat Catolica Sedes Sapientiae per formar de membres d’un desenat de nacions originàrias per tal que se pòscan consagrar a l’ensenhament de lors lengas.
 
Raportèrem, lo mes passat dins Jornalet, la primièra presentacion d’una tèsi doctorala en quíchoa. Ara, es una autra universitat peroviana que ten lo privilègi d’aver aculhit la primèra tèsi en lenga shipibo.
 
 
 
 
 
 
 
abonar los amics de Jornalet
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Loís
1.

Perfièch ! Un grand desvolopament pels dreches de las lengas indigènas e sas culturas ! E ara quora tendrem una tèsi en occitan ;)

  • 2
  • 0

Escriu un comentari sus aqueste article