Actualitats
Lo Centre Regional dels Ensenhaires d’Occitan festeja sos 50 ans
Lo 18 de genièr, a l’Ostal d’Occitània de Tolosa, se celebrarà la creacion del CRÈO en 1969
Normalament, Andrieu Lagarda, malgrat sos 94 ans, vendrà a la fèsta que se farà a partir de 17h30 aquel dissabte 18 de genièr. Foguèt lo fondador a Tolosa en 1969 del Centre Regional dels Ensenhaires d’Occitan (CRÈO) e ne demorèt lo president fins en 1991, quand se retirèt de l’ensenhament. Acompanhèt las debutas de l’ensenhament de l’occitan dins lo public. Foguèt primièr dins lo segondari, e sustot en licèus, que rapidament aguèt fòrça escolans. Lo CRÈO, que recampa los ensenhaires d’òc, foguèt tre la debuta un centre de formacion, d’expression e un interlocutor credible amb las administracions escolaras. Lèu lo CREO de Lagarda faguèt de libres, de material pedagogic. Dins aquestas annadas, lo CREO de Tolosa capitèt a federar mai de 300 regents, professors et animators d’occitan.
D’autras acadèmias faguèron de CRÈO tanben sul modèl tolosan. En 1989, se creèt la Federacion dels Ensenhaires de Lenga e Cultura d’Òc (FÈLCO) qu’amassa totes los CRÈO d’Occitània. Sas accions permetèron la creacion del CAPES d’occitan en 1992 que permetiá d’acompanhar la creissença dels efectius en tot professionalizant lo mestièr de professor d’occitan.
Un anniversari necessari de celebrar a un moment ont l’acadèmia mondina viu una ataca en règla contra l’ensenhament de l’òc del ministre Blanquer: pòstes suprimits, baissa dels efectius.
Se farà qualques discorses per celebrar los 50 ans del CRÈO de 17h a 18h. Los autres presidents, que i aguèt aprèp Andrieu Lagarda, deurián èsser presents tanben: Suzy Izarn, Felip Carbona, Alan Rainal, Muriel Batbie, Estève Bordoncle, Pèire Escudé, Nicolau Rei Bèthvéder e l’actual Emmanuèl Isopet.
Concèrt d’Alidé Sans e sopar
A 18h00, se farà un concèrt d’Alidé Sans (gratis) e a 18h30 lo CRÈO de l’acadèmia de Tolosa ofrirà l’aperitiu als presents dins un ambient de convivéncia. Tot aquò serà seguit d’un sopar, a 19h, a l’interior de l’Ostal d’Occitània organizat pel CRÈO Tolosa e l’associacion País de Catinon. Au menut i a un caçolet tolosan, seguit d’una tarta pera-chocolat preparat peu tractaire F. Arlet de Carbona. Costarà 10 euros sonque e vos caldrà reservar al prèp del CRÈO Tolosa.
Per acabar, dançarem de 20h30 a 22h, amb una balòcha tradicionala occitana faita pels collègas ensenhaires deu grop TÈRCES. Es gratis tanben.
Nicolau Rei Bèthvéder
Fèsta dels 50 ans del CREO
Dissabte 18 de genièr de 2020 de 17:30 a 22:30.
Ostal d’Occitània de Tolosa,
11 Carrièra Malcosinat,
sala Antonin Perbòsc.
Mètro Esquiròl.
Reservacion pel repais: creotoulouse@gmai....
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Molts d'anhs per lo mieg segle d'ensenhament de la lenga nostra. Urrà !
Teni de dire que tròbi particularament desplaçada l'idèia de "festejar" e de "caçolejar" qué que siá a l'ora ont assistissèm a la destruccion complèta de l'ensenhament de l'occitan en licèu e a la destruccion del trabalh dificil de mantunas generacions de professors,
- dins una situacion ont cap de las reivindicacions portadas pel CREO pendent mai d'un an foguèt pas complida.
- dins una situacion ont las dificultats, a totes los grases (1èr, 2nd, superior), arrèstan pas de se multiplicar sens poder s'endralhar sus de camins optimistas.
La decéncia commandariá de desplaçar tota festivitat a un moment realament apropriat.
Andrieu Lagarda, malgrat sos 94 ans " : Longa vida a-n-aquel valent !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari