Bandièra01 1180x150: Comuna de Tolosa

Actualitats

EnvironamentInternacional

Austràlia: son a sacrificar 10 000 dromadaris

L’illa compta mai d’un milion d’aqueles animals introduches pels colonizaires al sègle XIX, e ara pausan un problèma per la secaresa e la calor dels incendis dins la region d’Aṉangu Pitjantjatjara Yankunytjatjara

| free aussie stock
Austràlia es darrièrament al centre de las informacions ecologicas. Los grèus incendis que crèman lo país dempuèi setembre passat an causat un desastre environamental de las consequéncias imprevisiblas en tuant un miliard d’animals, mai que mai d’espécias endemicas. En mai d’aquò, aquesta setmana son a tuar 10 000 dromadaris dins la region d’Aṉangu Pitjantjatjara Yankunytjatjara, un endrech plan pauc abitat qu’es administrat per un govèrn local aborigèn. Los dromadaris los tuaràn per evitar qu’accediscan a las fonts utilizadas pels abitants de la region. Atal, dempuèi dimècres passat, una còla de francs tiraires an, pendent cinc jorns, la mission d’abatre totes los dromadaris.
 
Aṉangu Pitjantjatjara Yankunytjatjara es una region de 102 650 km2, es a dire, mai de la mitat de tota Occitània, ont i demòran sonque 2300 personas. Es tanben victima dels incendis mas amb mens violéncia qu’en Nòva Galas del Sud. Pasmens, la calor e la secaresa an fòrça damatjat la region, abitada per de nombroses dromadaris. Segon las autoritats localas, “amb las condicions de secaresa actualas e futuras, las grandas concentracions de dromadaris menaçan las comunautats e las infrastructuras d’Aṉangu Pitjantjatjara Yankunytjatjara, e los cal contrarotlar”.
 
Segon Marita Baker, elegida del conselh local, la region se tròba “dins de condicions de calor insuportablas”. L’elegida precisa que lo mond se carrejan mal “perque los dromadaris venon e daissan d’excrements, venon a l’entorn dels ostals e ensajan de beure l’aiga dels aparelhs de l’aire condicionat”, çò rapòrta The Australian.
 
 
Un problèma similar al dels lapins
 
Lo dromadari es un animal introduch pels umans qu’an colonizat l’illa. Los angleses menèron aqueles camelids d’Índia e d’Afganistan e se’n serviguèron coma animals de transpòrt durant lo procès de colonizacion. Puèi, amb la mecanizacion, foguèron liberats e se multipliquèron long de l’illa de tal biais qu’en 2008 i aviá entre 1 e 1,2 milions de dromadaris salvatges. Segon los abitants, los dromadaris provòcan de damatges grèus a l’environament e a las infrastructuras.
 
S’agís d’un problèma similar al dels conilhs. A la fin del sègle XIX ne importèron 24 exemplars e a l’ora d’ara se calcula que n’i a devèrs 200 milions.
 
La societat australiana de prevencion de la cruseltat envèrs los animals (RSPCA segon sa sigla en anglés) reconeis qu’en de circonstàncias que i a cal eliminar de populacions salvatjas, mas demanda que se faga amb de “metòdes umans e de tòcas concretas e eficaças”. E mai accèpten lo sacrifici en qualques cases extrèms, son partisans de l’esterilizacion.
 
 
 
 

 
 
 
abonar los amics de Jornalet
 
 

 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Abans de matar a los camels qu'es maten els, cola de subnormals !

  • 2
  • 0

Escriu un comentari sus aqueste article