Lo Carnaval a Bisa es una tradicion…Dempuèi quora? De mal saupre… Podèm remontar tranquillament a la debuta del sègle XX, de segur! Cada an, torna arribar al mitan de l’ivèrn per rescalfar los còrses e los còrs abans d’intrar dins la Quaresma.
 
A l’ora d’ara, las datas son fixadas en foncion del calendièr escolar: rendètz-vos pres per la dimenjada del mitan de vacancas d’ivèrn!
 
Per l’edicion 2020, quatre jorns de fèsta, totes una capitada, a començar per l’eleccion de Miss Carnaval lo divendres de ser, una sala clafida de mond malgrat la data qu’èra lo jorn de Sant Valentin.
 
Lo dissabte de ser, amb lo grop de musica London, la joventut se poguèt animar e dançar un brave moment de la nuèit dins un ambient agradiu.
 
Malgrat l’abséncia del solelh aqueste dimenge, lo passacarrièra foguèt un còp de mai una reüssida. Las tradicionalas majoretas de Bisa dobriguèron lo cortègi. Puèi, plaça a Sénher Carnaval, rei d’un jorn, seguit per un calivari de carris ont se posquèt encontrar d’unicòrns, d’indians, de mexicans e quitament l’òme Nadal (s’èra perdut, pauret!) La reina de carnaval amb sa rauba tota polida tancava la marcha. Tot aquò dins un tarabastal de bandas e de batucadas, de rires e de crits! La fèsta foguèt apreciada tant pels badaires que pels mascats, dels mai pichons als mai grands (cada annada, lo club del tresen atge Lo Recanton se retròban per desfilar!).
 
Carnaval s’esperlonga lo diluns de matin amb lo torn de taula: los joves del vilatge acompanhats de qualques musicians passan dins los ostals per quistar un pauc de moneda que servirà per finançar la fèsta. En escambi d’una musiqueta lo mond balharàn lor peçòta!
 
Per clavar aquela fèsta: plaça al bal mascat animat dempuèi 24 ans pel grop Pierre Lebrun, dins la tantossada pels pichons, e fins al pichòt matin … pels mai grands. Es amb lo solelh levant que se manjarà los creissents, que remplacèron la sopa d’alh, e que nos direm «a l’an venent»!
 
Per totes los esfòrces fornits per una tan grand succès, podèm mercejar totes los benevòls orquestrats pel comitat de las fèstas de Bisa de Menerbés.
 
A l’an que ven per un novèl Carnaval fòl!
 
 
 
 
Amèlia Chabaud
Estudianta d'occitan a l’Universitat Pau Valèri de Montpelhièr




            
        
    

fffff		fffff
	Jornalet a l'escòla Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a. Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans. Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…