Bandièra01 1180x150: Comuna de Tolosa

Actualitats

Colossala manifestacion a Bilbao contra la dispersion dels presonièrs bascos

Libertat! e l’eurodeputada tolosana Catherine Grèze an sostengut la manifestacion

Tèxte legit

Las carrièras del centre de Bilbao (Bascoat) s’empliguèron de gents dissabte de ser per una manifestacion organizada pel collectiu Herrira (cap al país) en defensa dels dreches dels presonièrs d’ÈTA. Jol lèma “Dreches umans, solucion, patz: presonièrs bascos al Bascoat”, la manifestacion cerquèt d’“exprimir la volontat majoritària de la societat basca”. Demest los participants, i aviá de representants dels partits de la coalicion EH Bildu e d’Ezker Batua. I aviá tanben de representants de Libertat!, l’eurodeputada tolosana d’EELV Catherine Grèze, lo deputat d’ÈRC a Madrid Joan Tardà e lo deputat de la CUP al Parlament de Catalonha David Fernández, entre d’autres.


Davant la manifestacion i aviá las forgonetas que cada dimenjada, menadas per de volontaris, menan de parents dels presonièrs bascos a las presons alonhadas del Bascoat.
 
“L’opinion favorabla als dreches dels presonièrs despassa de luènh las barrièras ideologicas e politicas”, çò diguèron los organizaires de la manifestacion. O a demostrat, çò disián, la pluralitat de las personas e dels collectius qu’an manifestat.
 
Herrira considèra que la mobilizacion es imprescindibla per metre fin a “l’actitud de blocatge” dels govèrns espanhòls e francés per çò qu’es de las demandas d’ÈTA de dialogar la fin del conflicte armat. De mai, la participacion “colossala” d’aquela manifestacion pòt refortir l’exigéncia envèrs los dos govèrns per qu’enreguen una nòva politica penitenciària, qu’abolisca la dispersion, que libère los tretze presonièrs grèvament malauts e qu’anulle la doctrina 196/2007 del Tribunal Suprèm espanhòl. La doctrina 196/2007 es una interpretacion juridica qu’aquela cort establiguèt en 2007 per negar a qualques presonièrs bascos los beneficis penitenciaris que la lei establís, en los obligar a demorar almens 30 ans en preson.
 
Lo sosten internacional a la manifestacion venguèt pas solament d’Occitània e dels Païses Catalans. Dins la lista dels sostens a Herrira i a tanben de sindicats coma lo GIC galèc, lo CSI asturian, los Còbas italians, l’Intersindicala d’Aragon, lo PGFTU de Paquistan, l’UTIER de Puerto Rico, la CSTS del Sahara Occidental, l’union sindicala Solidaires de França e lo CATH d’Haití. Manifestèron tanben d’organizacions coma Addamer (Palestina), Coiste (Irlanda), los Colombians per la Patz, la Coordinacion de Solidaridat amb Cuba (Espanha), PYD (Curdistan), Sinn Féin (Irlanda), Purna (Aragon), Azarug (Illas Canàrias) e lo Partit de l’Union Democratica (Curdistan), en mai del cònsol de Marinaleda (Andalosia), Juan Manuel Sánchez Gordillo, e los actors espanhòls Pilar Bardem e Guillermo Toledo.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article