Polemica al club nautic de Marselha après los prepauses racistas del president del Yatching club de la Poncha Roja, Christian Tommasini. Dins una reünion tenguda lo 22 de febrièr, Tommasini passèt de l’injúria racista a l’incitacion de la violéncia raciala dins un conselh portuari sens èsser interromput, çò rapòrta Marsactu que ne publica l’enregistrament.
 
La reünion èra organizada per la Metropòli e se trobavan presents la majoritat dels intervenents abituals. Mentre que se parlava de las dificultats per metre los batèls a l’aiga, Tommasini prenguèt la paraula e diguèt: “N’ai un sadol, deis arabis. Pòdes pus ren faire sensa que leis arabis te vengan far cagar”. Puèi insistís: “Ren que de melons, que d’arabis. Pas un blond, un blanc, un qu’es ben coma fau, non, que d’arabis”. En seguida, petèron del rire los presents, e Tommasini contunhèt: “Lo jorn ont faudrà que lei francés reagiscan e que se fau armar, serai lo primier a anar faire de ratonada”.
 
Un dels assistents concluguèt: “Aquò pòu pus contunhar coma aquò”. De son latz, Didier Réault, vicepresident de la metropòli delegat al litoral e president del pargue nacional de las Calancas, li respondèt sul ton de l'umor: “Estigmatizes”.
 
 
“Ai petat lei plombs”
 
Contactat per France Bleu, Christian Tommasini expliquèt qu’aviá “petat lei plombs”, que sas paraulas avián “despassat sa pensada” e qu’èra alassat dels actes d'incivilitats, de las degradacions, dels trafecs illicits quitament sul pargatge de la mesa a l'aiga, e de las menaças.
 
 
La comuna de Marselha o denóncia
 
De son caire, la vila de Marselha anoncièt dimars passat qu’aviá sasit lo procuraire de la Republica per denonciar de prepauses d’injúria racista, de difamacion racista, d’incitacion publica a la violéncia e a l’odi racial. Mentretant, las subvencions al Yatching club de la Poncha Roja son suspendudas.