Bandièra01 1180x150: Comuna de Tolosa

Actualitats

EspòrtInternacionalPoliticaSocietat

Un jove esportiu italian se suicida a causa d’un racisme insuportable

Aviá 20 ans e èra un jove fotbalaire prometeire. Dins sa letra d’adieu assegurava que lo retorn del faissisme italian fa venir la vida insuportabla als negres

Tèxte legit

Seid Visin, un jove esportiu italian, s’es suicidat en seguida de menaças e d’insultes racistas. Aviá 20 ans e èra un jove fotbalaire prometeire. Pasmens, dins la letra que daissèt escricha abans de se levar la vida, Visin assegurava que lo retorn del faissisme italian fa venir la vida insuportabla als negres.
 
“Senti l’agach de fàstic de las gents a causa de la color de ma pèl. Quand me veson, citan Mussolini, CasaPound o Salvini”, çò a escrich. “Coma se deguèsse aver vergonha d’èsser negre, coma se deguèsse aver paur d’èsser pres per un immigrat, coma se deguèsse demostrar a las personas, que non me coneissián pas, qu’èri coma eles, qu’èri italian blanc”.
 
Nasquèt en Etiopia mas una familha italiana l’adoptèt quand aviá sèt ans. Gràcias a son engenh, arribèt de jogar dins las esquipas filialas de l’AC Milan e del Beneventp Calcio. Totun, coma plan d’autres joves, poguèt pas jogar al nivèl professional e se concentrèt suls estudis. Pus tard, venguèt jogaire de fotbòl en sala.
 
“Soi pas un immigrat”, çò ditz sa letra d’adieu. “M’adoptèron quand èri pichon [...] Me ramenti que totes m’aimavan. Pertot ont que foguèsse, pertot ont qu’anèsse, totes s’adreiçavan a ieu amb jòia, respècte e curiositat. Ara sembla que tot se siá capvirat. [...] Aviái reüssit a trobar un emplec que deguèri quitar perque tròp de personas refusavan de se far servir per ieu e, coma s’aquò me faguèsse pas sentir pro mal, me senhalavan tanben coma responsable que maites joves italians (blancs) non trobèsson pas un emplec.”
 
Son ancian club, l’AC Milan, a exprimit sa simpatia a sa familha e a sos amics. “I a pas de mot per dire adieu a un jove de 20 ans”, çò a dich sus Twitter.
 
 
 
 

abonar los amics de Jornalet

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Cercaval
3.

Al nòstre lo RN(azi) vòl ganhar de regions. D'unes agachan de l'autre costat, que de se'n mainar seriá politic. Veirem ben ont l'apolitisme nos mena...

  • 1
  • 0
Franc Bardòu
2.

Aviá 20 ans e èra un jove fotbolaire prometedor. Dins sa letra d’adieu assegurava que lo retorn del fascisme, per exemple italian, fa venir pertot la vida insuportabla als negres. Als negres, si ben, de segur, mas pas sonque ! Lo fascisme fa venir la vida insofribla a totes gents senudas…

  • 4
  • 0
francesc Palma
1.

Compreni qu' es fort aver d'aguantar tants de subnormals insultant lo.

  • 1
  • 0

Escriu un comentari sus aqueste article