An tuat lo president d’Haití, Jovenel Moïse. L’assassinat se faguèt aqueste dimècres passat quand un grop de personas non identificadas intrèron dins la residéncia del president a Port au Prince abans de li tirar dessús. La femna de Moïse, Martine Marie Etienne Joseph, foguèt nafrada e moriguèt qualques oras pus tard a l’espital.
 
Lo primièr ministre, Claude Joseph, vendrà president interimari. A fach una crida a la calma mentre que la polícia e l’armada ensajan d’esclarzir los faches e prenon lo contraròtle de la seguretat del país. Dins un comunicat, lo cap del govèrn a dich que qualques unes dels assassins parlavan espanhòl. De soslinhar que la lenga oficiala es lo francés e que la lenga populara es lo creòl.
 
Haití viu una prigonda crisi politica, economica e sociala, que s’es manifestada per un ajornament de las eleccions, l’aument de l’inseguretat alimentària e l’emigracion de milièrs de personas. Ara, après l’assassinat del president, la situacion d’Haití pòt empejorar.
 
Moïse aviá 53 ans. Foguèt investit president en febrièr de 2017. Son mandat foguèt marcat per las protèstas antigovernamentalas, que dempuèi julhet de 2018 an daissat environ 200 mòrts. Èra tanplan acusat de corrupcion e d’aver censurada la premsa. El governava per decret dempuèi mai d’una annada a causa de l’abséncia d’un parlament elegit.
 
Moïse aviá fach un calendièr electoral per ensajar de metre fin a l’instabilitat politica. Al començament aviá convocat un referendum per reformar la Constitucion en abril, puèi lo reportèt a junh e fin finala a setembre, durant lo primièr torn de la presidenciala.
 
Aquela incertitud afècta tanben lo govèrn, que lo dirigís Joseph dempuèi abril. Aquesta meteissa setmana, lo president aviá nomenat Ariel Henry, ancian responsable del Ministèri de l’Interior, coma nòu primièr ministre. L’aviá encargat de resòlver lo “problèma flagrant” de l’inseguretat e de sosténer lo conselh electoral per far las eleccions generalas e lo referendum.
 

The president of Haiti, @moisejovenel, has been assassinated by a team of commandos who attacked his home in the hills above Port-au-Prince. Pray for #Haiti and its people. pic.twitter.com/SiWNIwtxm8

— Michael Deibert (@michaelcdeibert) July 7, 2021