L’ostal d’edicion Reclams presenta lo primièr roman de l’escrivan bearnés Benoît Larradet. Entitolada Jamei aiga non cor capsús, l’òbra sembla un conte e conten tres istòrias crosadas. I a l’istòria d'un tronc d'arbre dels Pirenèus, vengut mast d'un batèl negrièr que, pendent una tempèsta als apròchis d'Argentina, se romp e s’esclapa. Aquí, a la broa del Río de la Plata, va discutir amb un indian, Talcaolpen, darrièr descendent de sa tribu. Los dos protagonistas se van contar lors epòcas passadas, lors beutats e lors dolors. Pus tard, lo bearnés José Lostalet, vengut gaucho dins la Pampa, ven suls luòcs mas sauprà pas jamai cossí aquel tronc es arribat en aquel endrech.
 
Nascut en 1954, Benoît Larradet es mai que mai conegut coma jogaire d'acordeon diatonic dins lo grop Brigada Menestrèrs. Es tanben secretari de l'associacion Bearn Argentina, un país que coneis plan ben gràcias a sa familha e a son interès personal.
 
L’autor presentarà lo libre a Tolosa lo 2 de decembre que ven a la Tuta d’Òc.

 
 

 
 

---

LARRADET, Benoît. Jamei aiga non cor capsús. Reclams, 2021. 189 paginas, 15 èuros

 

fffff		fffff
	Presentacion a Tolosa:
	2 de decembre a 18h La Tuta d’Òc 11, Carrièra de Malcosinat 31000 Tolosa