Lo 19 d’abriu Jornalet se venguèt presentar en Carcassés e Cabardés. A tres oras de l’après-dinnar, es la calandreta Puèg Marin de Carcassona que reçaupèt Ferriol Macip Bonet, lo cap-redactor, e Gerard Joan Barceló lo corrector lingüistic. Doas classas de CM escotèron amb interès las explicacions donadas e pausèron de questions fòrça pertinentas sul foncionament de Jornalet. Un diaporama preparat per la còla de Jornalet ajudèt a la compreneson dels escolans.
 
Foguèron espantats de veire lo tablèu de son audiéncia e de comprene que Jornalet èra vist dins lo Mond entier (levadas 3 pichòtas zònas)
 
En fin d’après-dinnar es a Argon, vilatge de Cabardés, que se tenguèt un rescontre organizat per l’associacion “Fasètz la lenga en cabardés” e l’IEO 11, per festejar lo 10n anniversari de Jornalet.
 
Un temps convivial agradiu seguiguèt lo rescontre.
 
Aquelas intervencions son benvengudas per faire conèisser lo mèdia occitan.
 
TèVéÒc filmèt las doas intervencions e una emission sortirà en mai, ajudant ansin a la comunicacion de Jornalet. Coma totes los mèdias occitans, Jornalet òbra per la defensa e la promocion de l’occitan e de la cultura occitanas.
 
De retrobar sus jornalet.com, amb tota l’actualitat, las nòvas mondialas e de segur las emissions de TèVéÒc!
 
 
 
 
La còla de TèVéÒc