Bandièra01 1180x150: País Invisible

Actualitats

Besièrs: 800 escolans a l’entorn del libre en occitan

L’ochena edicion de La Passejada del prèmi literari Calandreta se tenguèt al Pargue dels Poètas de Besièrs

Lo divendres 13 de mai, l’ochena edicion de La Passejada del prèmi literari Calandreta se debanèt al Pargue dels Poètas de Besièrs. Foguèt organizada en partenariat amb la Calandreta Dagdenca, la Mediatèca Occitana de Besièrs, lo CIRDÒC, la comuna de Besièrs, las Federacions Calandreta d’Aude, d’Erau, de Gard e de Lengadòc, l’establiment d’ensenhament superior Aprene, lo collègi Clardeluna, l’associacion Calandretas Besierencas e las associacions de las 3 escòlas Calandreta de Besièrs, l’Ametlièr, los Falabreguièrs e lo Garric.
 
Aquela jornada es la conclusion del projècte del prèmi literari Calandreta que se debanèt long de l’annada escolara.
 
Lo prèmi literari Calandreta es un projècte dobèrt a totas las classas occitanas. Demèst una seleccion de 4 libres per cada cicle, los escolans devon causir lor preferit e votar per el.
 
Permet d’atalentar los enfants al libre e de desvolopar lor plaser de legir. Es l’escasença per eles de s’apropriar un patrimòni literari dels joves e de participar a de discussions ont s’agís d’argumentar, justificar o avalorar lor causida.
 
Son prèp de 1500 escolans e 88 classas de tota Occitània (86 classas Calandreta e 2 classas bilinguas de paritat orària de l’escòla Nelson Mandela de Besièrs) qu’i participèron aquest an.
 
Lo resultat del prèmi literari Calandreta 2022
 
Pel cicle 1, las autoras seleccionadas èran:
 
— Raphaelle Jessie e Bubol per Dab los amics, avajons la marmòta.
 
— Julie Léglise per Quicòm dins la cauna
 
— Agnes Do per Boleta e las colors
 
— Cécile Langonnet per Las emocions.
 
L’autora qu’aguèt lo mai de vòtes es Julie Léglise per Quicòm dins la cauna.
 
Pel cicle 2, las autoras seleccionadas èran:
 
— Sofia Jacques Serano per La cabr’estela
 
— Patricia Pallier per Lo baron de Tustamina
 
— Anne-Marie Caparros e Martina Prévot per Un solelh sul cap
 
— Marineta Mazoyer per Mon oliu tan polit.
 
L’autora qu’aguèt lo mai de vòtes es Sofia Jacques Serano per La cabr’estela.
 
Pel cicle 3, los autors seleccionats èran:
 
— Hélène Ourtiès (revirada de Jean-Claude Forêt) per Lo secret de Les.
 
— Annick Jahan (revirada per Mirèlha Braç e Alan Roch) per L’oliu del giratòri
 
— Jaumet Demèsa per Òme d’Òrb
 
— Alphonse Daudet (revirada de Andrieu Lagarda) per Las letras de mon molin.
 
L’autor qu’aguèt lo mai de vòtes es Jaumet Demèsa per Òme d’Òrb.
 
Demèst los participants, 800 escolans e 36 classas se recampèron, doncas, al Pargue dels Poètas de Besièrs, lo 13 de mai passat per d’obradors, de la dança, de la musica, de contes, de rescontres amb los autors e ... per la remesa dels prèmis literaris 2022 tant esperada.
 
 
 
 
Federacion Regionala Calandreta de Lengadòc
 
 
 

 

 
fffff fffff
 Jornalet a l'escòla

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

 Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…
 
   

 
 abonar los amics de Jornalet

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Virtualis
3.

#2 Avètz tras que rason, es la puta realitat, plan malaisida d'ausir per certs ! Mistèri Grand : après pus de 40 ans de Calandrètas qu'an ensenhats e formats maites e maites neo-locutors en occitan, autant de belucs e belugas que devian propagar e far espelir tornamai la lenga, i-a pas agut de risorgimento de l'occitan, la pasta a pas près. La lenga a pas renascut, se charra pas, restontis pas pus per carrièiras. S'es refugiada dins un mond parallèl, imaginari e virtual. E o constatar es pas insolentar lo trabalh valent de las Calandrètas.

  • 3
  • 0
André Cétouver
2.

#1 Bon, de cap ad aqueth devís volontariste plen de bona volentat, que vau abordar l'auta cara de la montanha... Las Calandretas, las seccions bilingüas, etc... òc mes a la fin, qüant de locutors ? Despuish quan exista Calandreta ? Despuish quan ensenhan l'occitan en collègi/licèu ? Despuish tot aqueth temps, avem vist un cambiament, quitament menin en la societat ? Quina lenga parlan amassa los mainatges ? Mes sustot quin ratio de locutors a la fin ? 1% dilhèu ? E sus aqueste 1% que va parlar a l'atge adulte, qüan transmeteràn la lenga a la hèita fin (dab tots los alèas de la vita : mudar, celibat, tribalhar hòra país, etc) : 0.5% ?

Qué har : se hóner en un monde qui serà de dia en dia mei anar mei "desoccitanisat" o víver en un monde parallèle ? Lutar... qu'ei plan mes perqué ? Har tot çò qu'ei possible per transméter la lenga au ton mainatge entà que non la posqui pas parlar sonque dab tu ?

N'ei pas negativitat o plaser de véder las causas en negue... Mes que'm pensi aqueras questions, non las pausam pas jamei... Uei lo dia, qu'i a hòrt d'iniciativas de cap a la lenga e, per aquò, la situacion qu'ei, segon las mias lutz, sordeisha que jamei... Impossibilitat de trobar locutors, mòrt deus darrèrs (e aquò en lo mon parçan arreculat, imaginatz donc en endrets mei "civilisats" on aquera despartida se hadó 50 ans a dejà...). Que podetz traucar Tolosa, Bordèu, Montpelhèr e Marsilha 100 còps de seguida e botar l'aurelha a l'audíser : jamei n'enteneratz arrés a parlar occitan. Aquò, la (mia, au mens) realitat de uei lo dia....

  • 16
  • 4
Belugueta Carcassona
1.

Quante plasèr de veire toteis aqueleis enfants banhar dins la lenga occitana ! La releva es indispensabla e lei calandretas i jogan un ròtle grand. Lei seccions bilinguas de l'ensenhament public tanben.
Anem Òc ! fau tirar l'araire maugrat lei dificultats permanentas e leis empachas.

  • 15
  • 0

Escriu un comentari sus aqueste article