Lo 13 de mai, se tenguèt a Tonder, en Danemarc, la 13a edicion del Liet Internacional, qu’es lo festenal europèu de la cançon de las lengas minorizadas, eveniment ailàs tròp pauc mediatizat, ont es enebit de cantar en anglés. Es la version internacionala d’un concors de cant apelat “Liet”, que vòl dire “cant” en frison, organizat al començament a Ljouwert (en neerlandés Leeuwarden).
 
La cantadora Doria Ousset interpretèt en còrs (e en toscan) la cançon Roma, un tèxt signat per Paul Turchi-Duriani que parla d’un episòdi dolorós del sègle XVIIn de l’istòria de la comunautat còrsa de Roma, e emportèt aquela edicion, davant lo grop de la region de Schleswig-Holstein Yourdaughters, amb la cançon Hudsult, e Carolina Rubirosa que cantèt O Teu camiñar, un títol en galèc.
 
Es lo segond còp qu’una cançon en còrs ganha la competicion, après Jacques Culioli en 2008 amb Hosanna in excelsis.
 
 
De ligams fòrts amb Occitània
 
Mas çò que cal saber es que Doria Ousset possedís un ric fons pluricultural, e, joncha per telefòn, expliquèt a Jornalet qu’a, a l’encòp, un pepin còrs e un pepin occitan de Bigòrra. Es per aquò qu’a totjorn mantengut amb Occitània un ligam fòrt. Visquèt fins a l’edat de 16 ans a Tolosa e podèm citar dens son repertòri per exemple la cançon de Francis Cabrel In Extremis, traducha en còrs per Patrick Croce e en occitan pel conegut Franc Bardòu.
 
A mai, coma las agaças fan pas de cocuts, Doria ven d’un familha de musicians, que son paire e son oncle, Claude e Yves Ousset, jògan amb la cantadora occitana Séverine Bonnin, descobèrta 2021 del prèmi Joan-Pau Verdièr.
 
Per tant, podèm pas que saludar aquesta escasuda de Doria Ousset, exprimir lo desir de la veire virar en çò nòste dins un avenir pròche e nos organizar per mediatizar un pauc mai aquel eveniment cultural que val lo còp.
 
E solide, per ausir la prestacion magistrala e la granda votz de Doria:
  

 



JML/Red.