Ven de nàisser totSuma, un sit web catalan de finançament collectiu que s’adreiça als projèctes de la societat civila trabalhant per la lenga e la cultura del país e que destinarà 5% dels beneficis a la promocion del catalan sul malhum.
 
Un dels projèctes que dobrís aquel sit de micromecenatge, es l’album d’Ò.K.! Brigada Internacionau. Es un ensemble de musicians occitans e catalans qu’an bastit un repertòri festiu e tropical sus las cançons mai conegudas dels dos païses e las doas culturas. Aquela còla, après aver sonat a Barcelona, Tolosa e Rodés, son a preparar lor primièr album e cèrcan lo finançament per mejan de totSuma.
 
Lo finançament collectiu, tanben conegut coma micromecenatge o crowfunding, es un sistèma de petitas contribucions economicas, individualas e de quantitat liura; que totas amassa fan possible de finançar un projècte concret. Los que donan recebon de presents en foncion de la quantitat portada.
 
TotSuma es un sit de micromecenatge amb una vocacion sociala e un engatjament amb la construccion nacionala catalana. Los projèctes finançats per mejan d’aquel sit an en comun que vòlon contribuir al progrès e a la sobeiranetat del país.