Bandièra01 capçalera  1180x150: Novestivada

Actualitats

Gasoductes Nord Stream: segon Seymour Hersh, los Estats Units son a l'origina del sabotatge

Lo jornalista reputat assabenta que, per far pression sus Russia, de cabussaires de l’armada estatsunidenca placèron los explosius suls gasoductes

Tèxte legit

A la fin de setembre, las autoritats danesas e suedesas detectavan de pèrdas dins los gasoductes sosmarins; acusèron Moscòu d’aver provocat doas explosions per los far venir inutilizables. Ara, lo jornalista estatsunidenc Seymour Hersh assegura que foguèron los Estats Units que sabotèron e faguèron espetar los gasoductes, coma mesura per far pression sus Russia.
 
Segon Hersh, de cabussaires de l’armada estatsunidenca placèron los explosius suls gasoductes en junh de 2022 durant l’operacion Baltops 22 de l’OTAN. Puèi, segon lo jornalista, los explosius foguèron activats lo 26 de setembre per de fòrças norvegianas que lancèron d’un avion un gavitèl que los faguèt espetar.
 
Segon lo reportèr, lo president Joe Biden decidiguèt de sabotar Nord Stream après mai de nòu meses de discussions secretas amb la còla de la seguretat nacionala de Washington. L’Union Europèa foguèt fòrça greujada a causa d’aquel sabotatge.
 
Lo govèrn de Biden assegura que lo rapòrt de Hersh es “fals” e “fictiu”. De son latz, lo Ministèri dels Afars Exteriors de Russia demanda d’explicas als Estats Units.
 
Seymour Hersh es un jornalista d'investigacion especializat dins los afars militars estatsunidencs e los servicis secrets. Escriu sustot per The New Yorker e TheNew York Times. Es a l'origina de nombrosas revelacions, coma d'actes de tortura a Abu Ghraib o encara lo massacre de Mỹ Lai en Vietnam, revelacion per la quala obtenguèt un prèmi Pulitzer.



abonar los amics de Jornalet

 

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
1.

Aqueste jornalista del nom re raumàs ara sembla qu'es un arganhòl que se vòl far remarcar. Se comença de veire qu'aviá cargat sul visqui en se pensant qu'èra d'antesita.

  • 3
  • 0

Escriu un comentari sus aqueste article