Bandièra01 1180x150: País Invisible

Actualitats

Enfin, La Seria sus France TV a partir del 7 d’abril

Lo dijòus 6 d’abril, se festejarà l’eveniment amb una avantprimièra sus grand ecran al cinèma Pathé Wilson de Tolosa

Tèxte legit

Dètz ans après lo filmatge de son pilòt en estiu de 2013, La Seria va enfin sortir! Es la primièra sèria producha per France 3 Occitanie e, a partir del 7 d’abril que ven, se poirà seguir sus la plataforma numerica de France Television. S’agís d’un projècte original e amusant de 5 episòdis de 40 minutas filmats entre Tolosa e Barcelona e jogats en occitan, francés e catalan.
 
Aquela sèria de television occitana es nascuda del trabalh associat de l’escrivan tolosan Julien Campredon e del realizaire tolosan Amic Bedel. Lo trabalh de tria de la còla de Piget, la paciéncia e la persisténcia a cercar de finançaments an ben capitat. L’aventura la nos contarà un making of qu’acompanharà la difusion.
 
 
Avantprimièra al Pathé Wilson de Tolosa
 
La velha, lo dijòus 6 d’abril, se festejarà l’eveniment amb una avantprimièra sus grand ecran al cinèma Pathé Wilson de Tolosa a 19h30 ont se difusarà, pel primièr còp, la sèria tota entièra.
 
La difusion de La Seria l’acompanhan la region administrativa dicha Occitània, lo CIRDÒC, l'Agéncia Occitanie Films, en associacion amb France 3 Occitanie.
 
A totes nosautres de sosténer lor dardalhament en Occitània e endacòm mai, pel plaser dels publics.
 
 
De sesilhas escolaras
 
En mai d’aquò, de sessions escolaras seràn organizadas, sostengudas per la creacion de documents pedagogics que permetràn de melhor comprene las estapas de fabricacion de la sèria e de partejar d'informacions e de reflexions sus la faiçon dont aquela ficcion s'inscriu d’un biais natural e singular, dins la cultura occitana.






Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lilo
4.

"sèria"?? MDR....

  • 3
  • 0
Sèria
3.

2 "Seria"???
Et vas-y que je t’embrouille, cap a París! Los qu'an un pichon exagòn ⬡ dins la tèsta coneisson lo camin.
De còps, avèm rason d'escotar los araneses per retrobar l'accent tonic normal de l'occitan.
Ieu m'estimi mai "sèria".

  • 3
  • 3
Perdial
2.

« La Seria […] Es la primièra sèria. »
Et vas-y que je t’embrouille, cap a Barcelona ! Los Araneses coneisson lo camin.
Ai cercat « sèria » amb un accent, abans de comentar, l’ai pas trobat enlòc.
Soi pas al nivèl.

  • 4
  • 1
Laurenç
1.

Au cap de 10 ans????? n'ei pas seriós aquerò....quina trufanderia! quina manca de respècte per la cultura nosta!

  • 9
  • 1

Escriu un comentari sus aqueste article