Bandièra01 1180x150: Comuna de Tolosa

Actualitats

Montpelhièr a festejat la primièra nòça omosexuala de l’estat francés

Vincent Autin, dins sos quaranta ans, e Bruno Boileau, dins sos trenta, èran desconeguts per l’opinion publica fins a fa qualques jorns. Dempuèi ièr son lo primièr parelh omosexual que se son maridats legalament dins l’estat francés. O faguèron dins una granda expectacion e malgrat las protèstas de l’ultradrecha.


Lo caractèr istoric d’aquela primièra nòça s’es demostrat amb lo luòc ont se faguèt, la sala d’onor de la mairia de Montpelhièr, amb una granda lista d’assistents: aperaquí 200 parents e amics del parelh e qualques 300 convidats del mitan associatiu e politic. Demest los convidats i aviá la ministra dels Dreches de las Femnas e pòrtavotz del govèrn francés, Najat Vallaud-Belkacem, e la ministra de la Familha, Dominique Bertinotti. Mai de 130 jornalistas cobrissián l’eveniment.
 
Lo fach que Montpelhièr siá la primièra vila d’Occitània e de l’estat francés ont se fa una nòça omosexuala se deu, sustot, a la militància de la consolessa, la socialista Hélène Mandroux. En febrièr de 2011 jonguèt ja simbolicament dos omosexuals.
 
La lei qu’autoriza lo matrimòni e l’adopcion a las personas del meteis sèxe s’aprovèt dins lo parlament francés lo 23 d’abril. Après un recors de l’oposicion de drecha al Conselh Constitucional, negligit lo 17 de mai, se promulguèt l’endeman, 18 de mai.
 
 
Oposicion de la drecha
 
La nòva lei, promesa pel president socialista François Hollande pendent la campanha electorala, fa que França siá lo quinzen estat del Mond qu’autoriza los ligams entre las personas del meteis sèxe. Ça que la, lo procès legislatiu que s’es seguit fins a la primièra nòça s’es acompanhat de manifestacions en favor e tanben contra. Los opausants, convocats per de formacions de drecha e de collectius catolics, an sovent derivat en actes de violéncia, menaças e agressions omofòbas.
 
La darrièra manifestacion contra l’egalitat dels dreches pels omosexuals se debanèt dimenge passat a París. A la fin de la marcha, de grops de l’ultradrecha s’afrontèron violentament a la polícia, amb lo resultat de 350 detenguts.


Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jacme Tolosa
3.

s'espèra ara lo divòrci mediatizat !

  • 1
  • 0
Batko
2.

Ei ua fiertat que se sia debanat en Occitània !
Se que non, a balhat lo parat de véser l'ostau de vila deu Clapàs, ua realizacion mussolino-fraichenca d'un gost dobtós.

  • 11
  • 1
Lutz
1.

Òsca ! :)

  • 9
  • 0

Escriu un comentari sus aqueste article