Los collegians bascos e bretons an pogut far l’espròva de sciéncias del brevet en lors lengas pròprias. Lo Ministèri francés de l’Educacion a autoritzadas las escòlas immersivas Seaska e Diwan a far aquel examen de fin de collègi en basco e en breton respectivament. Contràriament a çò que s’èra anonciat, las espròvas redigidas en  basco e breton seràn corregidas, çò rapòrta Diari de la Llengua.

Lo ret d’escòlas immersivas en basco, Seaska, obtenguèt lo permés de l’administracion en març passat après fòrça insisténcia. Demest las nombrosas protèstas podèm soslinhar que d’unes ensenhaires refusèron arunan de corregir las espròvas de sciéncias.

Los bretons de Diwan recebèron l’autorizacion dissabte, dos jorns abans lo començament de las espròvas e après que divèrses escolans aguèron avertit que farián l’examen totun en lor lenga.

Fins ara, totas las espròvas se podián far en una lenga autoctòna autra que lo francés franc de las sciéncias, pr’amor que la matèria s’incorporèt en 2018, un an après que se foguèt permés de far las autras especialitats en breton e basco. Los responsables de las escòlas immersivas an denonciat, mai d’un còp, aquela contradiccion fins que lo Ministèri de l’Educacion lor done rason.