Bandièra01 capçalera  1180x150: Novestivada

Actualitats

L’estranh accident d’avion qu’a tuat Prigojin

La mòrt del cap e fondador del grop Wagner clava l’estonant episòdi de la rebellion contra Putin en junh passat e refortís lo poder del president rus

Tèxte legit

Dempuèi dimècres passat, los mèdias an pro parlat de la mòrt de Ievgueni Prigojin. Lo cap del grop de mercenaris Wagner, qu’entamenèt una malescasuda revòlta contra lo Kremlin en junh passat, es estat identificat oficialament coma un dels passatgièrs d’un avion civil que s'escrachèt dimècres passa en Russia. Totes los ocupants de l’avion, tres pilòts e sèt passatgièrs, perdèron la vida. L’agéncia russa TASS a confirmat lor identitat en citant lo servici de premsa del Ministèri de las Situacions d’Emergéncia. L’accident d’avion se tenguèt la velha del Jorn de l'Independéncia d’Ucraïna e 18 meses après la debuta de l'invasion russa d’aquel país.

La mòrt de Prigojin poiriá aumentar lo contraròtle del govèrn rus sul grop Wagner. Aqueste grop de mercenaris ten una influéncia significativa en Africa, en ofrissent de servicis de seguretat dins d’estats coma Mali e la Republica Centreafricana.

Las circonstàncias de l’accident son pas encara claras e las autoritats russas an dobèrt una enquista. La mòrt de Prigojin fa pausar de questions sus sas repercussions sus la situacion politica e militara russa e mai internacionala.

 

Donat per mòrt ja en 2019

 

Prigojin foguèt ja donat per mòrt en 2019, tanben dins l’encastre d’un “accident” d’avion en Còngo. Mas quand lo considerèron oficialament defuntat, lo mercenari reapareguèt en public e desmentiguèt sa mòrt. L’avion èra un aparelh rus que s'emplegava per transportar de cargas en Còngo e volava de Goma a Kinshasa quand subran desapareguèt del radar. Moriguèron dos ciutadans russes  sens relacion amb  Prigojin, de militars congoleses e de membres de l’entorn presidencial.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Josep Maria Miquel Coma-ruga
1.

Estranh accident?

  • 2
  • 0

Escriu un comentari sus aqueste article