Dempuèi d’annadas, a Albi, la dictada se ten sul temps escolar. Per 2024, èra lo dimars matin 16 de genièr. 240 joves i participèron: escòlas bilingüas d’Albi e de Puèggoson, calandreta d’Albi, collègis d’Albi e de Sant Juèri, licèu Bellavista. Un vintenat d’adultes faguèron tanben la dictada tirada del libre Atal fasèm de Sèrgi Viaule.

Cada an, los professors s’encargan de la correccion collectiva pels escolans e collegians. Cada classa participanta ganha un prèmi.

Del temps de la correccion de la dictada dels liceans e dels adultes, abans la remesa dels prèmis, qualques activitats son prepausadas: pichon vespertin, cant, danças occitanas.

En mai de la satisfaccion del nombre de participants, la formula permet als joves de n’encontrar d’autres, d’ausir d’adultes que parlan la lenga. La socializacion es una dimension importanta de l’operacion.

Cal mercejar los professors, presents tre la preparacion de la dictada, e los caps d’establiments que lor autorizacion es indispensabla.

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…