Bandièra01 1180x150: Comuna de Tolosa

Actualitats

Catalonha a dich al Mond que vòl èsser un estat independent

1 600 000 personas, segon de chifras oficialas, se son tocat las mans en una cadena umana long de Catalonha per demandar l’independéncia del país

A 17h14 (ora que simboliza la desfacha de Catalonha en 1714), las campanas de la catedrala vièlha de Lhèida an marcat simbolicament lo començament de la Via Catalana, una cadena umana qu’a traversat Catalonha del Voló fins a Vinaròs. Organizada per l’Assemblada Nacionala Catalana (ANC), gaireben dos milions de personas se son tocat las mans per far una cadena de mai de 400 quilomètres e reclamar l’independéncia de Catalonha, en una Diada que vòl èsser istorica, un an après la manifestacion del milion e mièg de personas en Barcelona. Las campanas dels cloquièrs sonèron per tot lo país, fins que la presidenta de l’ANC, Carme Forcadell, anoncièt que la cadena èra completa. Segon de donadas oficialas, i an participat 1 600 000 personas. De fach, dins la majoritat dels tròces, las tièras èran doblas.
 
“Ara e aicí, l’Assemblada Nacionala Catalana torna mostrar son engatjament de trabalhar sens defalhir fins al moment que Catalonha serà un nòu estat d’Euròpa”, çò diguèt Forcadell dins son discors difusat en dirècte per qualques ràdios. Forcadell demandava als elegits de convocar la consulta sus l’independéncia en 2014. “Volèm pas, ni podèm pas esperar mai”, çò diguèt en apondent que, se la consulta es pas possibla, cal que los elegits fagan “las accions necitas per que Catalonha venga un estat liure e sobeiran”. “Volèm que 2014, lo tricentenari de la nòstra desfacha, siá lo primièr an de la nòstra libertat!”, çò exclamèt.
 
Al País Valencian de milièrs de personas avián començat la “Cadena Umana per la Lenga e la Libertat” a 17h07, ora que simboliza la desfacha del país en 1707. A 17h14 jonguèt la Via Catalana. Ailà, sus la linha de la frontièra administrativa entre lo País Valencian e Catalonha, se tocavan las mans los musicians Carles Santos e Lluís Llach, en un gèst cargat d’un simbolisme prigond. La justícia veniá de permetre, al darrièr moment, la celebracion de la cadena umana dins lo País Valencian, que se faguèt dins un mitan plan revendicatiu, e mai se la Gàrdia Civila, plan nombrosa, intimidèt los participants e quitament detenguèt lo politician independentista Alfons López Tena. Lo menèron al comissariat per l’identificar, segon los agents.
 
La cadena intrèt qualques quilomètres en Catalonha Nòrd, fins a El Voló.
 
L’ANC qualifiquèt l’eveniment de “reüssida categorica” e d’una “nòva demostracion de fòrça per que lo referendum d’autodeterminacion se mene a tèrme en 2014”. De fach, la Via Catalana “a subreondat totas las previsions e a despassat en nombre la manifestacion d’arunan, quand un milion e mièg de personas —segon la polícia— demandèron l’independéncia dins las carrièras de Barcelona”.
 
 
Participacion occitana
 
Qualques collectius occitans avián cridat a la Via Catalana. De representants de País Nòstre, Iniciativa per Occitània, Partit de la Nacion Occitana, Libertat! e Partit Occitan an participat en divèrses tròces de la cadena umana.
 
 
Reconeissença a Aran e a Occitània tota
 
Dins l’encastre dels actes oficials de la Diada, se faguèt una reconeissença a Occitània, al 800n anniversari de la desfacha de Murèth, al 700n anniversari de la Querimònia d’Aran e a la solidaritat amb lo país aranés, victima dels aigats en junh passat. Dins aquel sens, la musiciana aranesa Alidé Sans cantèt l’imne occitan (vidèo).
 
 
Agression espanholista a Madrid
 
Dins la capitala d’Espanha, un grop de militants d’ultradrecha intrèt amb impunitat dins la delegacion de la Generalitat de Catalonha per empedir l’acte que s’i debanava.
 
En brandissent de drapèls espanhòls e en cridant que “Catalonha es Espanha”, lancèron de gas lacrimogèn, agrediguèron qualques presents e provoquèron qualques damatges materials. Cap de policièr o empediguèt pas. Demest los ferits i a una drolleta de 4 ans e un representant de l’ambaissada dels Estats Units.
 
Los faches son estats enregistrats per las camèras de television.




Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Damian Tolosa de Lengadòc
6.

Visca Catalonha liure ! Quina 'passada' tot'aquela istòria, coma dison ! Es fantastic !

Ieu tanben èri a la Via de Tolosa en tant que defensor de la democracia, de la libertat e dels drets dels Catalans !

Pensi tanben qu'una Catalonha liure poiriá balhar una novèla impulsion, siá pichona, a la lenga aranesa e mai generalament a la lenga occitana.

Los Catalans nos an fach mai d'un present per çò de l'occitan (oficialitat, etc.). O devèm pas doblidar, nosautres Occitans.

  • 13
  • 0
Quentin Willaume Marck (62) / Ais (13)
5.

Quina bèutat e quina sensacion!!! Vèire tot un pòble, Catalonha, que vòu son independéncia, d'èstre libre, es bèu! Es subrebèu! Aquò fa caud au còr de vèire tot un pòble unit per çò que vòu, de mostrar tota aquela volontat, de viure en libertat e en dignitat! Ieu disi: òsca en totei qu'an participat, OCCITANS E CATALANS, UNITS FINS A LA FIN DAU MOND! Es aquò l'amistat occitano-catalana! Endavant! E que 2014 siaga una annada melhora que 2013 amé aquest nou pais, esperam! Visca Catalonha, nou estat d'Europa!

"De l'amistat e de la volontat entre leis umans,
totei se donèron lei mans" ma frasa!

Quentin, aimador de la cultura occitana e de l'amistat occitano-catalana.

  • 22
  • 0
Ares Bossòst-Barcelona
4.

#2 Jo tanben i ère, ath Tram 62, damb era banèra dera Val d'Aran

  • 18
  • 0
Raibeart Brus Allt a' Bhonnaich
3.

#1

♪♪♫ Lo temps compta per un peta ♪ ♫ ♪ ♫
♪ ♫ Quand siás un con, siás un con ♪ ♫♫

  • 17
  • 0
Casterà
2.

Quauqui aranesi i èrem. Se Catalonha trionfe, Aran e Occitània tabé

  • 20
  • 0

Escriu un comentari sus aqueste article