Lo 6 d’octobre, au bolodròm de Tornafuèlha (Gasconha tolosana), s’ei debanat la purmèra copa “Vascònia” de jòcs tradicionaus gascons. Aquesta competicion sustot amistosa e hestiva qu’amassèc las esquipas d’Occitània e deu Bascoat. La purmèra èra estada seleccionada per l’associacion “Lo Bolegatoish” e compausada per Lina Laffont, Joan-Maria Darricau e Nicolau Bianchini. Entà poder participar aus jòcs, un nivèu A2 minimau d’occitan èra estat demandat aus jogaires, çò qui estoc pleat shens nada dificultat quan sabèm que los dus purmèrs asseguran los corses de lenga a Tornafuèlha e que lo tresau, joen jogaire de rugbi de XIII a Tolosa, ei un ancian de la Calandreta de Sant Çubran on son pair Patric ei regent. La dusau esquipa èra ua representacion de l’associacion Denak Bat, installada a Colomièrs.
 
La competicion s’articulava a l’entorn de tres jòcs tradicionaus promoguts per la Dauna Delapòrta de la Federacion deus Larèrs Ruraus de Gers: Palet Gascon, Quilhas au malhet e Rampèu de l’Astarac. Après duas oras dedicadas a l’iniciacion deu public, l’encontre Occitània-Bascoat inaugurèc ua seria que los organizaires espèran longa. Tanlèu aviada la partida, la còla sang e aur gahèc lo hòrt aus punts shens de pas jamei deishar l’avantatge aus sons adversaris totun valorós.
 
L’esperit de la jornada èra purmèr l’escambi e l’encontre interculturau, çò qui estoc hèit mercés aus grops musicaus presents coma Brankabodegaires e Denak Bat qui hascón ausir lo txistu, la bodèga e l’atabal. La musica deu Massilia Sound System acompanhèc lo vrèspe d’aviada entre duas intervencions en dirècte.
 
Los organizaires, l’associacion de Tornafuèlha “lo Bolegatoish”, hèra satisfèits de l’ambient, espèran l’an qui veng acampar tanben esquipas bretonas e catalanas (o autas…) entà crear ua diada hestiva on las lengas pòscan sonar e on la copa serà tornada botar en jòc.
 
 
 
 
Joan-Marc Leclercq