Bandièra01 1180x150: Comuna de Tolosa

Actualitats

Calandreta que vòu víver!

Aqueste dissabte, lo movement Calandreta que manifestè per las carrèras de Pau, en Biarn

| Matieu Casanòva
A l’origina de l’esmalícia populara: la volontat deu prefècte deu departament deus Pirenèus Atlantics de non pas renovelar la convencion existenta enter l’escòla Calandreta d’Artics e la comuna biarnesa. Aquò que significaré tot simplament la barradura de l’establiment tanlèu la fin de l’annada e l’impossibilitat taus vint e sheis escolans actuaus de seguir un ensenhament immersiu en lenga nosta.
 
Entà argumentar lo son arrefús, lo prefècte que mentavè la lei Falloux, ua lei adoptada en 1850 e qui non permet pas de logar a gratis locaus tà ua estructura d’ensenhament privada. L’Estat que sembla de’s desvelhar plan tard puish que l’escòla en question e demòra a Artics despuish 2006 e ei donc en contracte oficiau dab l’Educacion Nacionau. Logicament, lo movement Calandreta que cranh que los autes establiments, nombrós en aqueth parçan, e sian tanben miaçats per la prefectura.
 
La manifestacion d’aquesta dimenjada qu’estó ua vertadèra escaduda puish que son un milierat de personas que participèn a aqueth aplèc. Qu’èran segur majoritàriament biarnés mes pas sonque: que s’i vedó tanben bascos de las Ikastola, monde de la Calandreta de Brageirac qu’es pas encara creada mei que poderé ubrir au mes de seteme qui vien. Tanben que hasó lo camin lo president de la federacion de las Calandretas, Joan-Loís Blenet.
 
Arron un purmèr estanc cap a l’ostau de la vila de Pau, lo seguici, gavidat per calandrons, que s’amassè Plaça Clémenceau au còr de la vila. La manifestacion que s’acabè en cançon, un ambient conviviau qui n’escon pas totun lo chepic deu monde de Biarn qui revendican lo dret naturau de poder contunhar d’ensenhar aus mainats en occitan. L’ahar n’ei pas acabat e la luta que risca de durar. Causa segura: la volontat deu govèrn de ratificar la Carta Europèa de las Lengas Regionaus e Minoritàrias n’empacha pas que, dens lo medish temps, representants de l’Estat e s’apliquen a limitar lo desvolopament de la socializacion de la lenga. Ua contradiccion de mei tau govèrn socialista en plaça.
 
 
 
 
Matieu Casanòva
 


_____
La Setmana:La Calandreta d'Artics que demora en plaça
Editoriau: Calandreta: tornarmai la repression
Fòtos de Paraulas en Òc

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Guilhèm Bearn
8.

Arron 500 (lhèu 600) manifestants (450 segon la polÍcia).
Monde vienguts de Bearn mei que mei (solide), quauques representants de las Ikastoloak bascas (pertocadas peu medish problèma, puish qu'avem lo medish prefècte, o meilèu : Nosautes Bearnés, per un còp que pagam d'estar en lo medish Departament com los Bascos, per'mor Valls que's vòu har petar los Bascos), tanben de Bressolas (ce's pareish, ne'us èi pas vists), e amics de Tolosa, Besièrs e Montpelhièr.

  • 4
  • 0
Gerard Joan Barceló Pèiralata
7.

#6 Problèma tecnic o pas, cal pas acceptar que l'ensenhament de la lenga nòstra siá sempre precari.

  • 3
  • 0
lucasac
6.

#4 Lo pbma de la Calandreta d'Artics n'ei pas mei, adara, la question de la mesa a disposicion a gratis de locaus per la comuna, puish a que paga un loguèr de 300 € mensuaus, mes la de l'abséncia de conformitat d'aqueths locaus a las nòrmas existentas (mei que mei de securitat). Que i a ua solucion ad aqueth problèma, qui n'ei pas briga politic (au contre de çò d'explicat en la premsa e au parat de la manifestacion) : adobar los locaus o ne trobar d'autes. Qu'ei a la comuna, sustot, de s'ac véder. Au men avis, que i veiram mei clar arron las eleccions...

  • 1
  • 0
antalya
5.

Benlèu que cal anar tornar vèire aquel prefect e li explicar que Fransa a signat la carta de las lengas minoritaris e qu'aquèla signatura es pas folclòrica. Avèm de dreches las signaturas europencas an prioritat sus la leis francesas. E caldria atanben s'assabentar del costat de Brussels e s'en servir coma mejan de pression sul prefècte. Nos cal aprener a nos servir d'aquèla carta de las lengas minorizadas signada per Fransa.

  • 3
  • 0
Endavant
4.

Que cau diser totun que la calandreta d'Artix que paga deja un loguèr a la mairia (de cap a 300€). Tot qu'ei bon entà tirar sus las escòlas imerssivas: locaus non adaptats, ajudas de las mairias interditas,...

  • 2
  • 0

Escriu un comentari sus aqueste article