Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcAlbigésPaís d'Albi

Albi: la maire d’un escolan a ponhalat a mòrt una ensenhanta

La presumida assassina es una maire celibatària de 47 ans que sofrís de trebolums mentals sevèrs

Una ensenhanta d’Albi moriguèt divendres passat après que la ponhalèt la maire d’un escolan, que foguèt detenguda sul pic. Segon lo procuraire d’Albi, Claude Dérens, la maire intrèt dins l’escòla amb lo cotèl e, davant totes, ponhalèt l’ensenhanta, de 34 ans, per de rasons que son mesas en examen: “Quand i soi arribat”, çò diguèt lo procuraire, “la mèstra èra dins sa classa, amb l’arrèst cardiac, e ensajavan de la reanimar”.
 
Los faches se debanèron quand començavan las classas de l’Escòla Publica Édouard Herriot, davant los enfants.
 
Dins un comunicat, lo president francés François Hollande planguèt la tragèdia e diguèt que totes los sectors s’èran mobilizats per sosténer los enfants e lo personal que foguèron testimònis dels faches. “Tota la comunautat educativa es de dòl”, çò apondèt lo primièr ministre, Manuel Valls.
 
L’endeman del drama, una cellula psicologica se metèt en placa; e se saupèt quicòm sul perfil de l’assassina presumida, qu’es a l’ora d’ara arrestada e mesa dins un espital psiquiatric. Segon France Info, s’agís d’una maire celibatària de 47 ans que sofrís de trebolums mentals sevèrs, segon çò que raportèt lo procuraire. Èra seguida pendent aperaquí dos ans pels servicis de l’ajuda sociala a l’enfança. Al començament de l’an s’engatgèt contra ela una procedura d’abandon de menor perque una de sas doas filhas viviá dins l’estat espanhòl en çò d’una tanta. En aquel temps foguèt mesa en gàrdia a vista e internada d’ofici mas al mes de març, a sa sortida de l’espital psiquiatric, sens dire res a degun, decidiguèt de recuperar sa filha abans de l’escolarizar en mai dins aquela Escòla Édouard Herriot, a Albi. 




Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

BOURDON Pau
2.

Aquera regenta qu'a pagat de la soa vita las mancas de la psiquiatria francesa, consacradas per ua lei deu govèrn de Sarkozy. Quin se hè qu'aquera hemna "que sofrís de trebolums mentals sevèr" n'èra pas seguida ? Quin, dab aqueth estat de santat, a podut recuperar la soa hilha shens qu'arrés ne se n'avisèsse ? N'ei pas nada fatalitat se legem suus jornaus dramas qui'ns bromban hèitas qui èram mei acostumats a véder aus Estats Units: qu'ei lo resultat de l'accion politica e de la soa obsession neoliberau a estauviar los sòus. Que'n vedem aquiu lo resultat. En octobre passat, la navèra majoritat qu'a modificat la lei sarkozysta. Quau e'n serà lo resultat ? Que soi perplèxe.

  • 6
  • 0
Amalric de Montreal Montreal de Carcassés
1.

Professors fòrça mal pagats (una de las situacions pièger dels païses de l'OCDE), mal aprestats per far son trabalh, amb escolans irrespectuoses, administracions irrespectuosas, governaments mespresants, e ara, de parents d'escolans que vos i escotèlan sens rason : e se demandan cossí recrutar mai de professors…

  • 14
  • 0

Escriu un comentari sus aqueste article