Bandièra01 1180x150: Comuna de Tolosa

Actualitats

Bascoat: se son activadas las primièras adreiças d’Internet “.eus”

Parallèlament, lo 25 de julhet començaràn los nonanta “domenis pionièrs” amb lo sufixe galèc “.gal”

Après sèt ans de procès, lo domeni d’Internet per la comunautat culturala e lingüistica basca, lo “.eus”, a ja començat de circular sul ret. Dempuèi qualques jorns la Fondacion PuntuEus, encargada de lo gerir, l’a ja concedit a aperaquí nonanta entitats e institucions del país, qu’an començat d’activar gradualament lors adreiças acabadas en “.eus”. Es lo cas del jornal Berria o de la ràdio e television basca EITB. En concret son nonanta dos, “los domenis pionièrs” qu’an començat de foncionar abans lo 3 de decembre que ven, Jorn Internacional de la Lenga Basca, qu’es previst que se i dobrisca lo registre a totes.
 
Dins aquela fasa pionièra, i a d’entitats de dimension, origina e caractèr divèrses que comuniquèron lor interès a la Fondacion PuntuEus per aver un domeni dins la primièra estapa d’activacion. I a lo govèrn basco, la banca Eusko Jaurlaritza, los mèdias Berria e Euskal Irrati Telebista (EITB), las bancas Bankoa e Laboral Kutxa, l’entrepresa Euskaltel, las municipalitats de Baztan, Eibar e Sant Sebastian o lo sindicat LAB.
 
Lo 16 de setembre que ven, se dobrirà la fasa de lançament del domeni “.eus”, adreiçada a las institucions publicas, a las associacions e a las entrepresas que vòlgan sollicitar lor adreiça d’un biais prioritari, abans que lo registre se dobrisca en decembre al public en general.
 
 
Los nonanta pionièrs del “.gal”, lo 25 de julhet
 
Lo domeni “.eus” a comptat amb lo conselh de la Fondacion Puntcat catalana per fin d’obtéher un sufixe pròpri per la lenga e la cultura bascas. Demandèron tanben conselh, a l’entitat que gerís lo “.cat”, los promotors del domeni galèc, “.gal”, que prevei d’aver qualques domenis actius plan lèu.
 
De fach, lo Jorn de la Pàtria Galèga, lo 25 de julhet, es la data qu’an causit per activar los nonanta domenis “pionièrs”, correspondents a d’institucions, d’entrepresas e de collectius que “mostrèron lor engatjament dins la promocion de la lenga e la cultura galègas”.
 
Coma dins lo cas del “.eus”, las autras fasas de lançament del “.gal” començaràn en setembre e las adreiças pel public en general s’activaràn a la fin de l’annada.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gerard Joan Barceló Pèiralata
4.

#3 Cèrtas, mas s'atròba que la lenga d'Occitània es l'occitan...

  • 4
  • 0
BOURDON Pau
3.

#1 Pas "en Occitània", las extensions aqueras ne's concedeishen pas a un país, mes a ua comunautat lingüistica. Un basco de Buenos Aires que poderà demandar l'extension ".eus". O lavetz n'èi pas plan comprés.

  • 0
  • 0
Eric Arbanats 33
2.

Peu moment...

  • 5
  • 2
Gerard Joan Barceló Pèiralata
1.

E en Occitània, nat ".occ"...

  • 7
  • 0

Escriu un comentari sus aqueste article