Lo Parlament Europeu sostenguèt ièr la reconeissença de l’estat palestinian en una resolucion conjoncha qu’aguèt 498 vòtes en favor, 111 contraris e 88 abstencions. Lo tèxt es fruch d’un pache entre populars, socialistas, liberals e verds. La resolucion “sosten en principi la reconeissença de l’estat palestinian e la solucion de dos estats, e considèra qu’aquò se deuriá acompanhar de negociacions de patz”. Es un tèxt minimal qu’evita de demandar explicitament la reconeissença de l’estat palestinian.
 
E mai se los socialistas, los verds e l’Esquèrra Unitària volián que se demandèsse la reconeissença de Palestina coma estat, fin finala, e après qualques meses de debats, los populars an trebolat lo tèxt.
 
Lo govèrn de Suècia a ja reconegut l’estat palestinian, e los parlaments del Reialme Unit, de l’estat francés, d’Irlanda e de l’estat espanhòl an aprovat de resolucions ont ne demandan la reconeissença.
 
 
La justícia europèa anulla l’inclusion de l’Hamas dins la lista dels grops terroristas
 
D’un autre costat, tanben ièr, la justícia europèa anullèt la decision que l’Union Europèa prenguèt en 2003 de comprene l’organizacion Hamas dins de la lista dels grops terroristas. Lo tribunal considèra que la mesura se basèt pas “sus de faches examinats per las autoritats nacionalas competentas, mas sus d’imputacions factualas obtengudas de la premsa e d’Internet”. L’inclusion en aquela lista implicava lo gèl dels fonzes atribuits a l’Hamas e l’interdiccion als sieus membres d’intrar dins lo territòri de l’UE.