Una reportèra de la television estatsunidenca WDBJ-TV, associada a la CBS, e lo cameraman que l’acompanhava foguèron assassinats dimècres passat per un òme que se’n sarrèt e los fusilhèt, mentre que fasián una connexion en dirècte a Roanoke, un vilatge de Virgínia, als Estats Units. Las victimas èran Alison Parker, de vint e quatre ans, e Adam Ward, de vint e sèt. L’assassin, que se suicidèt puèi, èra un èx-companh d’eles. Se nomenava Vester Lee Flanagan mas èra conegut professionalment coma Bryce Williams, e fasiá un an qu’èra en comjat.
 
Coma se passa d’abitud dins los cases d’aquela sòrta, la publicacion del vidèo ont se vesiá l’assassinat en dirècte, e d’un autre vidèo enregistrat pel quite assassin, a levat una granda polemica. Los parents de las victimas, la television ont trabalhavan e las organizacions professionalas an demanat als mèdias de mostrar pas los imatges, çò que la majoritat dels mèdias an pas respectat.
 
YouTube, Facebook e Twitter son estats al mitan de la polemica per çò qu’an mes los vidèos a posita de totes. Qualques fiuladas que mostravan lo vidèo amb la foncion d’autoreproduccion son estadas fòrça criticadas.
 
Lo quite assassin publiquèt sus son compte Twitter un vidèo ont tua sos èx-companhs. Lo vidèo foguèt blocat e retirat abans cinc minutas, mas ja se n’èra fach de milièrs de còpias qu’en seguida un fum d’usatgièrs las an redifusadas per fiuladas. Lo meteis vidèo foguèt blocat per Facebook quinze minutas puèi, del temps que YouTube, segon una informacion de Le Monde, deguèt consagrar una còla especiala per retirar las versions dels dos vidèos que los usatgièrs cargavan sul sit “a un ritme de cada doas minutas”.