Bandièra01 1180x150: Comuna de Tolosa

Actualitats

Desbranda del “chavisme” en Veneçuèla

L’aliança opausanta obten 99 dels 167 deputats. Lo president Maduro demòra amb 46 deputats e accèpta la desfacha

Mentre que dins la màger part d’Occitània se votava al primèr torn de las eleccions regionalas, en Veneçuèla se debanavan las eleccions legislativas, qu’an portat un cambiament radical a la politica del país. L’aliança opausanta, lo Burèu de l’Unitat Democratica (MUD segon sa sigla en espanhòl), a ganhat clarament los comicis amb 99 deputats sus 167. Per contra, la candidatura oficiala “chavista”, lo Partit Socialista Unit de Veneçuèla (PSUV), a obtengut pas que 46 deputats. Nicolás Maduro a reconegut la desbranda e a dich qu’avián trionfat “la constitucion e la democracia”. De son costat, lo MUD a festejat la victòria en disent qu’èra lo primièr passatge del cambiament en Veneçuèla.
 
Lo PSUV aviá fins ara 100 dels 167 deputats del parlament e, doncas, la desbranda es estada frapanta. La presidenta del Conselh Nacional Electoral, Tibisay Lucena, a anonciat una participacion “extraordinària” del 74,5%.
 
Lo sistèma politic veneçolan es eminentament presidencialista. Lo movement opausant ensajarà de far de modificacions legislativas dins lo parlament, mas aqueles cambiaments pòdon trobar l’opsicion del poder del president Maduro, que serà president del país encara tres ans de mai. Caldrà veire cossí se resòlv aquela coabitacion.
 
Per Maduro, “a trionfat la guèrra economica, a trionfat una estrategia per vulnerar la fisança collectiva en un projècte de país, a trionfat l’estat de las necessitats creat per una politica de capitalisme salvatge, d’amagar los produches per los far venir mai cars”. De son costat, lo secretari del MUD declarèt que lo resultat manda un messatge a Maduro: “Lo pòble a parlat clar, las familhas veneçolanas son fatigadas de viure las consequéncias de la malparada, lo pòble tolerarà pas lo pus petit desviament dels principis establits dins la Constitucion”.
 
Vejatz las declaracions del president Maduro dimenge:
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

La dreta nomais reconeis los ressultats quan guanhan.

  • 4
  • 0

Escriu un comentari sus aqueste article