Bandièra01 1180x150: Comuna de Tolosa

Actualitats

Corsega: d’actes racistas descadenan una campanha corsofòba en França

La campanha contra la lenga còrsa embraga cap a una campanha denigracion de la nòva majoritat nacionalista

Eveniments d’Aiacciu: dos actes racistas
 
Sembla que lo racisme es lo motiu dels dos actes de violéncia qu’an desvariat Aiacciu e Corsega. Racisme anticòrs d’un caire quand, per la nuèch del ressopet de Nadal, una tropa de vesins del quartièr de les Jardins de l’Empereur, armats e encagolats, agressèron fisicament e nafrèron dos pompièrs qu’èran venguts luchar contra un fuòc en bramar: “Marrits còrses de mèrda, esbinhatz-vos. Aicí sètz pas en cò vòstre”. E racisme antiarabi d’un autre caire quand, en responsa a l’agression, après un rassemblament de sosten als pompièrs davant la prefectura d’Aiacciu, aperaquí 300 personas partiguèron cap al quartièr de les Jardins de l’Empereur. Un grop intrèt dins una sala de pregàrias musulmana e la metèron en rambalh, puèi escampèron un cinquantenat d’exemplars de l’Alcoran per carrièras en tot bramar “Arabis defòra. Sèm aicí en cò nòstre”.
 
Una segonda manifestacion de provocacion antiaràbia aguèt luòc dins lo quartièr en question e la prefectura de Corsega a interdich tota manifestacion publica dins aquel sector fins al 4 de genièr. Violéncias fisicas contra las personas per d’unes e violéncias materialas per d’autres, lo denominador comun es clarament l’asirança racista contra una minoritat.
 
 
Las reaccions en Corsega
 
Lo president de l’executiu còrs, Gilles Simeoni, a clarament condemnat los dos actes en portar una analisi fina. Anarà uèi diluns rescontrar los pompièrs e los vesins del quartièr incriminat. E diguèt que lo projècte de societat nacionalista es “lo refús de tot racisme e de tota xenofobia”. Apondèt: “Un pòble còrs, que òc, un pòble còrs dobèrt e capable d’integrar, amb de ciutadans que, quinas que sián lors originas, son a egalitat de dreches e de devers”. Suls actes violents e racistas, Simeoni declarèt: “Aquò non es pas la Corsega que volèm e aquò non es pas la Corsega qu’anam bastir”.
 
De son costat, lo president de l’Assemblada de Corsega, Jean-Guy Talamoni, tanben a denonciat fermament aqueles actes racistas. Per el, “Se vei ben que se tracta d’ideologias importadas, de gropusculs qu’an pas res a veire amb la tradicion politica còrsa”. Considèra los actes de degradacion de la sala de pregària d’una “grravitat immensa”.
 
Fòrça grops e associacions civilas còrsas an condemnat los actes, coma per exemple A Ghjuventù Indipendentista (la Joventut Independentista).
 
 
Refortiment de la campanha antinacionalista còrsa
 
En França, la campanha contra la lenga còrsa embraga cap a una campanha de denigracion de la nòva majoritat nacionalista. Una partida de la classa politica e mediatica francesa acusa lo nacionalisme còrs d’èsser responsable del racisme dins la societat còrsa, sens prene en compte que lo Front Nacional (FN) fa sonque lo 10,58% en Corsega contra lo 28% per l’estat francés. L’eurodeputat d’esquèrra Jean-Luc Mélenchon, conegut per sos prepauses francistas, a passat l’òsca amb un article de difamacion cap als ciutadans còrses. El ditz: “Vaquí ont menan lo nacionalisme extrèm e la cultura de la violéncia, lo mesprètz de las leis e de las valors republicanas, e aquesta incresabla embriaguesa etnicista, fins al ponch que lo president d’una assemblada refusa de far son discors inaugural dins la lenga comuna de la republica amb un mesprètz total per totes los que comprenon pas çò que ditz”.
 
Ara cal esperar que l’enquèsta capitarà a far lum per saber qui son los vertadièrs menaires d’aqueles actes. Es de mal creire a de movements espontanèus dins aquestas circonstàncias politicas.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

"Tàrrega" Igualada (PP.CC.)
4.

Civilitzats, primer Món, nacions avançades?
Amb el que s'ha fet als Corssos, França és posa a la cua del Món.
Carat nomès cal pensar com una persona feta i dreta, i no dir les tonteries que és diüen!
Tot el suport als corssos.
"Tàrrega".

  • 0
  • 0
Felip Martèl Montpelhier
3.

Los observators ordinaris suu continent se son curiosament dispensats d'observar que l'eslogan "on est chez nous" es tipic de las manifs de l'FN, que se pot a malaise sospechar de far dins l'etnicisme corsista... Ai provat d'o dire suu forum de Liberation, e, curiosament, mon comentari a pas passat, non pas que passava sens entramble una banda de messatges clarament d'ispiracion FN...

  • 17
  • 1
nadal/gasconha tolosana
2.

Sosten al poble còrs !

  • 12
  • 0

Escriu un comentari sus aqueste article