Los Dracs son dintrats dins l’espirala de la desfaita, çò qu’es un pauc malurós al moment ont las pelhòfas arriban.

Aqueste dimenge per anar jogar a Hull, facia al Hull FC qu’avián larjament batut lo 14 de julh passat, los Dracs recuperavan unes quadres: Greenshields, Sa, Anderson.
 
Los Dracs tenián lo còp en debuta de partida: un ensag de Dupòrt replicava a una conclusion de l’alièr Tineham. Mas los sang e aur mancavan unas ocasions de marcar alara que las Aglas de mar se privavan pas de bonificar un moment de dominacion: 12-6 a la pausa.
 
A la represa, un placatge mancat puèi una intercepcion se pagavan per dos ensags encaissats. Lo trauc èra fait e un segond ensag de dupòrt cambiava pres a l’afar: desfaita 30-10.
 
Los Dracs daissan la preséncia dins los 4 primièrs. Se trapan amb 30 punts coma lo tresen St-Helens e lo quatren Leeds. Mas Leeds a un goal-average de + 155 e los Catalans de… + 153!
 
E justament, son los Rinoceròs que debarcan dissabte a Brutús sul còp de 6 oras manca un quart del vèspre per jogar la centena partida dels Dracs dins lor estadi. La victòria es mai que jamai necessària. Se la caldrà ganhar sus la pelena e pas se dire que los Rinoceròs jogaràn amb lo fren a la man a una setmana de lor finala de la Cup (contra Warrington, disssabte 25).
 
E puèi, doblidetz pas que Sant Andrieu de Ròcalonga festeja lo rugbí, l’occitan e lo vin amb sos rendètz-vos d’animacion d’aqueste divendres 17 e dissabte 18 d’agost. dobertura amb l’espectacle del Claudi Alranq Rugby-Club Village divendres a 9 oras de la nuèit la sala de las Fèstas del vilatge.
 
 
 
 
Alan Roch