Bandièra01 1180x150: Comuna de Tolosa

Actualitats

L’assassinat de la cap indigèna d’Honduras Berta Cáceres, “una tragèdia anonciada”

L’activista, laureata amb lo Prèmi Goldman, aviá dirigit un movement de resisténcia del pòble lenca contra una restanca. Cáceres e sa familha èran estadas menaçadas

| Goldman Environmental Prize
“L’omicidi coard de Berta es una tragèdia anonciada. Pendent d’annadas, èra estada victima d’una campanha de secutament e de menaças per l'empedir de defendre los dreches de las comunautats indigènas”, çò diguèt la directritz per America d’Amnistia Internacionala, Erika Guevara-Rosas, sus l’assassinat, dijòus passat, de Berta Cáceres (42 ans), destacada activista pels dreches del pòble lenca, en Honduras.

L’assassinat se produsiguèt al domicili de Cáceres, a La Esperanza, dins lo departament d’Intibucá, un dels principals territòris abitats pels lencas. Dins aquela region i a lo riu Gualcarque, ont Cáceres dirigiguèt una campanha de resisténcia indigèna contra lo bastiment d’una restanca, Agua Zarca. Lo movement indigèna argumentava que l’infrastructura empediriá l’aprovesiment d’aiga, de manjar e de medecinas tradicionalas a las comunitats ribairencas.

La mobilizacion dirigida per Cáceres, coordinatritz del Conselh Civic d’Organizacions Popularas e Indigènas d'Honduras (COPINH), reüssiguèt que se retirèsson del projècte d’Agua Zarca tant la Banca Mondiala coma la constructritz de restancas chinesa Sinohydro.

Aquela victòria erigiguèt Cáceres en una figura fòrça prominenta del movement indigèna e environamentalista, e li valguèt en 2015 la concession del Prèmi Goldman, un dels mai prestigioses del Mond per rapòrt a la reconeissença de las luchas en favor de la conservacion de la planeta.

Dins un comunicat, la direccion del Prèmi Goldman a anonciat que trabalha amb Global Witness per “demandar al govèrn ondurian una enquèsta completa sus l’assassinat, la presa immediata de mesuras per garentir la seguretat de la familha de Cáceres, e garentir la proteccion dels activistas en Honduras”.

Segon un rapòrt de Global Witness, Honduras es lo país mai perilhós pels defensors de l’environament: entre 2010 e 2014 i aguèt mai d’assassinats per cap d’activistas environamentalistas que dins cap d’autre país del Mond.

En aquel rapòrt, Global Witness mençonava ja l’afar de Berta Cáceres, en aqueles moments menaçada e persecutada. “Dempuèi 2013”, çò disiá lo tèxt, “tres de sos collègas son estats assassinats pel fach de resistir contra la restanca d’Agua Zarca”. “An inventat d’acusacions penalas contra ela”, çò ditz encara lo rapòrt, “e dos de sos filhs an abandonat Honduras per paur de lor seguretat. Los vertadièrs autors d’aqueles crimes —un ret poderós d’interèsses entrepresarials e estatals— escapan sens puniment”.

Arunan, la raportaira especiala de l’ÒNU suls pòbles indigènas, Victoria Tauli-Corpuz, aviá alertat a prepaus de la “situacion critica” dels pòbles autoctòns e de lor manca de defensa davant d’invasors e de criminals.

Los indigènas e los los afrodescendents compausan aperaquí lo 8% de la populacion d'Honduras, segon de donadas del Minority Rights Group. S’i compren los pòbles lenca, pech, tawahka, xicaque, maia, miskito e garífuna.


Entrepobles: “Podèm pas dire que siá estada una suspresa

L’associacion Entrepobles, que collabòra amb lo COPINH, a publicat un comunicat, dins la linha d’Amnistia Internacionala, qu’afirma que la mòrt de Cáceres “podèm pas dire que siá estada una suspresa (...) Mai que mai dempuèi lo còp d’estat de 2009”, çò ditz lo comunicat, Cáceres “èra dins l’agach del crime organizat pels qu’an pas cap de escrupul de priorizar lor profièch, l’especulacion e lors sieus privilègis al dessús dels dreches dels pòbles e a la sostenibilitat de la vida, lo crime organizat dempuèi los doats del poder economic e politic”.


 
Aquesta nòva es adaptada de Nationalia amb qui Jornalet a un acòrdi de cooperacion.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Palma de Mallorca
1.

A Sud America acò de los terratinents matar a la gent que protesta es una causa que amb los governs reaccionaris passa molt. Los paramilitars quan se senten protegits per los governs d'extrema dreita, se n'aprofiten. Lo bisbe català Casal d'Aliga quasi fou assassinat per defensar a la paura gent pagesa.

  • 1
  • 0

Escriu un comentari sus aqueste article