Lo Salon del Mòble de Milan es una fièra que mòstra las darrièras novetats e innovacions liadas al sector del mobilièr. Dimars passat s’inaugurèt amb un convidat inusual: Toyota. La rason, es qu’aquela societat japonesa d’automobilas i presenta un prototipe de veitura descapotabla biplaça qu’es electrica e qu’es facha mai que mai de fusta. Aquela esportiva ecologica se nomena Setsuna, çò qu’en japonés vòl dire “moment”, pr’amor que se vòl soslinhar amb aquel nom los moments epecials e efemèrs qu’òm pòt viure amb aquela veitura. La tòca del fabricant japonés es ara de far de veïculs que sián unics.
 
Lo dessenh “rètro” de Setsuna a tanben fòrça sens per Toyota: es coma una “maquina del temps” que vòl simbolizar la transformacion qu’experimentan las veituras long dels ans e lo ligam amb lors proprietaris. De fach, un dels indicadors del taulièr de contraròtle es un comptador que marca lo cors del temps long de l’istòria d’una familha a bòrd de Setsuna. Lo comptador contunha d’avançar e mai se la veitura passa d’una generacion a una autra.
 
La veitura fa 3 mètres de long e 1,4 de larg e es facha amb de fusta de divèrses tipes. Las pèças son jonchas amb una tecnica tradicionala japonesa qu’a pas de besonh de clavèls nimai de vises.