Yahoo a espionat de centenats de milions de corrièrs electronics a la demanda de l’FBI e de l’Agéncia de la Seguretat Nacionala dels Estats Units (NSA) mejançant la creacion d’un logicial personalizat per analisar los emails recebuts, amb la tòca d’obténer d’informacions especificas.
 
Lo govèrn dels Estats Units demandèt a Yahoo que numerizèsse de centenats de milions de comptes d’email de sos clients amb la tòca de cercar una informacion determinada, segon çò qu’a raportat Reuters. E mai s’òm a pas especificat quina informacion se cercava, sembla que se poiriá agir d’una frasa, d’un còde especific o d’un document jonch dins qualques unes dels milions d’e-mails analisats.
 
Segon çò qu’an contat d’èx-salariats de la societat, l’NSA e l’FBI poirián aver demandat aquel servici non solament a Yahoo mas tanben a d’autras societats coma Microsoft o Google. Pasmens, un pòrtavotz de Google a declarat qu’eles avián pas “jamai recebut una sollicitacion d’aquela sòrta” en tot precisar que s’òm lor o demandava, “la nòstra responsa seriá simpla: de cap de biais!” E de son costat, Microsoft a precisat dins un comunicat que la societat s’es pas “jamai consagrada a la numerizacion secreta dels corrièrs electronics, coma se rapòrta que Yahoo a fach”, mas a pas volgut respondre se n’aviá recebut qualque demanda.