De milièrs de personas manifestèron dimenge passat dins divèrsas vilas de Marròc per mostrar lor indignacion après la mòrt de Mouchine Fikri, un jove peissonièr que moriguèt esclafat dins un camion d’acampatge de bordilhas, quand ensajava de recuperar lo peis que la polícia li aviá confiscat. L’incident se passèt divendres a Taghzut, e tanlèu coneguts los faches, se convoquèt de mobilizacions pels rets socials per protestar contra aquel “hogra”, çò es lo mesprètz de las autoritats.
 
En seguida de las protèstas, lo rei Muhammad VI a ordenat al ministre de l’Interior que vesite la familha del jove mòrt per plànher lo dòl en nom de la monarquia.
 
A Taghzut (conegut pel son nom arabi Al Hoceima), los manifestants descendèron la bandièra de Marròc e issèron la del pòble amazigh.
 
Cridèt a las mobilizacions lo Movement 20 de Febrièr, un collectiu qu’ocupèt ja las carrièras en 2011 per exigir de reformas democraticas dins l’encastre de la prima aràbia.
 
Aquela sòrta de manifestacions massissas son pas brica abitualas en Marròc. Las reformas de l’an 2011 provoquèron una tièra de reformas politicas limitadas, un aument de las despensas publicas e una politica de seguretat mai dura.