Bandièra01 capçalera  1180x150: Novestivada

Actualitats

Manifestacion istorica a Barcelona per l’independéncia de Catalonha

Dos milions de personas collapsèron las carrièras de Barcelona en tot demandar l’independéncia del país. La preséncia occitana foguèt remarcabla

| Jordi Loan

Barcelona visquèt ièr dimars, 11 de seteme, la manifestacion mai massissa de son istòria. Dos milions de personas segon l’organizacion, 1,5 milion segon la polícia, manifestèron per demandar l’independéncia de Catalonha.


Qualques oras abans de començar la mobilizacion, la ciutat de Barcelona èra ja collapsada. Lo percors de 3,5 quilomètres venguèt una concentracion mai qu’una manifestacion pr’amor que los manifestants non se podián pas botjar.
 
Foguèt ua convocacion eissida del pòble, e aital foguèt pas entestada per cap de representant politic mas per de sòcis de l’Assemblada Nacionala Catalana (ANC) amb de cantaires, d’actors, de jornalistas e de gents del mitan cultural.
 
A fòrça distància de l’entèsta, i marchèron los representants dels partits politics ÈRC, CiU, ICV-EUiA, CUP, SI, Rcat e qualques membres del PSC a títol individual. Nòu conselhièrs del Govèrn de la Generalitat s’i afigèron e entre eles i aviá la vicepresidenta Joana Ortega.
 
 
Superacion de totas las previsions
 
La presidenta de l’ANC, Carme Forcadell, diguèt als jornalistas que la plataforma se vegèt “totalament desbordada per la situacion”, pr’amor que la manifestacion, çò diguèt, “a superat totas las previsions”. L’entèsta de la manifestacion poguèt pas arribar al Parlament pr’amor que la marcha a pena podiá avançar.
 
Fin finala, una representacion de l’ANC e de l’Associacion de las Municipalitats Independentistas (AMI) quitèt la marcha e, per un autre camin, anèt autrejar lo manifèst final a la presidenta del Parlament, Núria de Gispert.
 
 
Demanda als deputats del Parlament per l’independéncia
 
La presidenta de l’ANC, Carme Forcadell, a demandat als deputats que comencen lo procès per un estat pròpri. Forcadell a reclamat tanben que se celèbre una consultacion dins totas las municipalitats e diguèt que, se lo president de Catalonha, Artur Mas, convòca d’eleccions coma un plebiscit, l’ANC o sostendrà. La presidenta del Parlament respondèt que la classa politica catalana escotarà lo clam que s’es viscut en las carrièras de Barcelona.
 
 
Lo president de Catalonha recebrà de representants de l’ANC abans dos dias
 
De Gispert confirmèt als representants de l’ANC e de l’AMI que lo president de la Generalitat de Catalonha, Artur Mas, los recebrà abans dos dias. De fach, lo president a parlat uèi a 9h30 per far una primièra avaloracion de la manifestacion. Dins la siá avaloracion, Mas, a celebrat l'enòrme succès de la manifestacion e a reconegut que lo clam per l'independéncia foguèt fòrça clar. Ça que la, "cal dotar Catalonha amb d'estrucuturas d'estat". "Catalonha deu far lo sieu procès de transicion nacionala", çò a apondut lo president catalan.
 
 
Una crida de sosten e de reconeissença al Mond
 
Mentretant, per carrièras, se legiguèt en qualques lengas de demandas a totes los païses del Mond per que balhen lor sosten e lor reconeissença a l’independéncia de Catalonha.
 
Se faguèt tanplan una consulta als manifestants, que respondèron afirmativament, en tot mostrar un papièr verd, a las questions seguentas:
 
1. Volèm exercir lo drech a l’autodeterminacion?
2. Volèm l’independéncia del nòstre país?
3. Volèm un drapèl catalan a l’ÒNU?
4. Volèm que nòstres representants politics s’engatgen a començar lo procès de secession?
5. Nos engatjam a trabalhar amassa per bastir un estat liure, independent e prospèr?
 
 
Preséncia occitana
 
Quitament se ièr èra jorn de trabalh dins la màger part d’Occitània, la representacion occitana foguèt granda amb de representants de País Nòstre, del PÒC, de Libertat! e PNO. “Un estat catalan independent que balhariá de vam a Occitània, e que portariá l’occitan coma lenga oficiala a l’UE e a l’ÒNU”.
 
Los occitans manifestèron just darrièr l’entèsta de la manifestacion, e aital de nombroses drapèls occitans foguèron presents en los imatges emeses per las televisions catalanas.
 
 
La Val d’Aran
 
Demest los drapèls occitans, n’i aviá d’araneses long de tota la manifestacion. Jornalet poguèt constatar la preséncia del sindic d’Aran, Carlos Barrera, en l’acte institucional del matin, e la preséncia en la manifestacion del vicesindic segond, Eduardo Valdecantos, e la del cap de la politica lingüistica del govèrn aranés, Jusèp-Loís Sans Socasau.
 
Qualques ciutadans araneses, interrogats per la còla de Jornalet, venián de Vielha, Betlan e Bossòst. Per eles, l’independéncia de Catalonha es importanta per la Val d’Aran, del temps que Catalonha reconeis lo fach aranés e que l’occitan i es lenga oficiala; per contra, Espanha non a fach cap d’esfòrç en aquel sens.
 
Manuèl, un òme de Vielha, se demandava çò que seriá Aran en una Catalonha independenta. Mas es clar que serà çò que lo pòble aranés voldrà. Coma o faguèt ja en 1313.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Peter Brussèlas
30.

#29 Es un pauc lo problèma de las minoritats lingüisticas. Per definir lor territòri, en lòc de prene las limits lingüisticas, se basan sus un territòri istoric. Aital, en Euskadi, impausan lo basc dins las regions que parlan espanhòl dempuèi fòrça temps. D'un autre costat, los Navarreses aiman pas tròp reconéisser lo basc sus lor territòri per que Navarra fa pas partida del Pais Basc istoric. Idèm pels bretonants que vòlon que la Nauta Bretanha (de lenga francesa, dialècte gallo) devengue bretonanta, quitament dins de regions e de vilas que lo breton i foguèt jamai parlat.

  • 0
  • 0
Manu
29.

#19 Desencusa-me de tornar sus una discussion ancian, mas vèsi de legir la setmana, e vèsi que se demanda la creacion d'una collectivitat territoriala basca amb Baiona coma caploc. Que cal far? lor explicar qu'es pas possible perque Baiona es occitana? los empachar de crear un tal ensemble? portar lo pet a l'ONU? mudar totes los bascofons al Petit Baiona e que s'i despatolhen? Me soi pas encara despartit de l'idèa que traçar de frontièras sus de critèris etnics/linguistics/socials... sia tant simple e natural coma semblavas d'o dire. Quitament amb bravament de reflexions.

  • 0
  • 0
Nirvana
28.

#26
Quand lo savi mòstra la Luna, los innocents agachan lo det.
Quand los independentistas mòstran la libertat, los antiindependentistas agachan lo det (o los caulets).

  • 1
  • 0
Halhèr Les
27.

#26 Erosament era majoritat de sabents e scientifics dera istòria non an cap pensat aquerò

  • 0
  • 0
Castèths
26.

Que vòletz semiar caulets en lo desèrt mes qu'ètz dijà a pensar au camion que cromparatz entà har lo marcat...

  • 0
  • 2

Escriu un comentari sus aqueste article