La banda dels quatre senhoreja…
 
Encara que los jogaires de Sent Gaudenç e d’Albi demorèron al caud o anèron esquiar vist que la partida prevista en Comengés foguèt anullada en causa de la nèu.
 
Las autras quatre partidas virèron a l’avantatge dels caps del classament. Dissabte, los Dragonets faguèron plegar aisidament Vilanòva: 48-10. Dimenge, l’AS Carcassona desrotlèt contra Tolosa: 46-22. L’alièr Sobeiràs marquèt 4 ensages. Foguèt mai complicat pel FC Lesinhan que recebiá Avinhon al Molin: egalitat 26-26 a la pausa per una victòria 50-38. Limós coneguèt totas las penas del Mond per s’impausar a Palau: 16-14 a la pausa e 20-18 al final.
 
 
Plaça a la Copa
 
La dimenjada venenta serà consagraada als 1/8ns de la Copa Lord-Derby. Dissabte, la partida Tolosa-Albi se jogarà a Blanhac abans lo rescontre amical entre la formacion primièra de Tolosa e los Dragons catalans que, totes dos, preparan lor intrada dins los campionats angleses.
 
Dimenge, en cap d’aficha, l’afrontament Lesinhan-Dragonets al Molin. Limós sap que lo novèl desplaçament a Palau serà pas una partida de plaser. A Domèc, Carcassona se mesfisarà del vam d’Avinhon.
 
Dos afrontaments Elèit 2-Elèit 1 son tanben al programa: Salon-Vilanòva e Carpentràs-St Gaudenç. En Vau Clusa tanben, un rescontre entre formacions d’Elèit 2: Entraigas-Ferrals. L’oitena partida opausarà la formacion de Division Nacionala 1 Pujòls als Catalans de Baó.
 
 
Los Dracs arrestan lo fuòc
 
Ongan, pas de camp d’entraïnament amb de fòrças militaras pels Dracs mas tres jorns d’estagi amb los pompièrs catalans per refortir la coësion del grop.
 
Per acabar l’estagi, un revelh a cinc oras e mièja del matin abans d’anar intervenir dins las aigas frejas de Tèt!!! Aprèp aquò, los Dragons arribaràn plan d’arrestar qualques Rinocèros o qualques Tigres!
 
 
 
Alan Roch