La ciberataca que comencèt divendres passat auriá ja greujat 200 000 usatgièrs de 150 païses diferents, segon çò que raportèt ièr dimenge l’Europòl. La ciberataca poiriá aver son origina dins de documents filtrats de l’Agéncia Nacionala de Seguretat dels Estats Units (NSA). Segon los expèrts, lo còde d’aquel malware o logicial maliciós, apelat “WannaCry”, sembla una derivacion del nomenat “Eternal Blue”, un trauc de seguretat de Microsoft que se crei que l’NSA auriá identificat fa longtemps. La societat d’analisi e recèrca globala Kasperskty Lab enregistrava lo meteis divendres 45 000 atacas contra de societats e organizacions dins tot lo Mond.
 
Uèi, lo nombre d’afectats poiriá créisser, car fòrça entrepresas tornan prene lor activitat. “A l’ora d’ara nos trobam totjorn davant la menaça; las chifras aumentan e pòdon contunhar de o far”, çò precisèt lo director de l’Europòl, Rob Wainwright.
 
Pel moment l’ataca l’an poguda arrestar. Un informatician trobèt dissabte una solucion per cancelar aquel virus. L’usatgièr s’avisèt que dins lo còde de l’ataca, se mençonava un sit web nom fòrça estranh qu’èra pas enregistrat. Alavetz, enregistrèt el lo nom, paguèt los dètz dolars e metèt en marcha aquela adreiça web, çò que bloquèt sul pic l’accion del virus. Ça que la, los piratas pòdon modificar lo còde e lo tornar activar.


L’origina se poiriá trobar dins un logicial raubat a l’Agéncia de la Seguretat dels Estats (NSA)

Lo còde que permet l’ataca se faguèt venir public lo 14 d’abril passat per un grop conegut coma Shadow Brokers. Aquel grop afirmava qu'aviá reüssit a panar una part del logicial que l’NSA emplega per espionar las institucions e las organizacions de tota la planeta. Shadow Brokers ensagèt de vendre lo còde, mas capitèt mal e per aquela rason lo distribuiguèt de biais dobèrt.
 
Aquela error de seguretat es coneguda dempuèi qualques meses e Microsoft publiquèt en març passat un logicial correctiu que lo resòlv, lo MS17-010. Es evident que fòrça entrepresas e organizacions l’an pas installat, perque se o avián fach, seriá pas estadas tocadas per l’ataca.
 
 
Lo WannaCry, qu’es aquò e cossí agís?
 
L’ataca es nomenada WannaCry e es del tipe “ransomware”. Afècta los sistèmas Windows, ne cripta los archius, tanben los que son salvats en linha, e infècta los autres sistèmas Windows del meteis ret. S’agís d’un logicial qu’ataca lo sistèma, blòca l’accès a de partidas determinadas o a cèrts archius, e demanda que se pague un rescat per eliminar las restriccions. Qualques emplegats de las entitats afectadas an recebut un e-mail que lor demandava un pagament en bitcoins, una moneda virtuala descentralizada.
 
Las atacas d’aquela mena an una particularitat. Dins de condicions precisas se pòdon espandir totas solas. Cal solament un biais d’accedir al sistèma, via e-mail o en descargant un archiu infectat, e un còp dins la maquina, l’ataca se propaga soleta per tot lo ret d’aparelhs.
 
Se recomanda de clicar pas sus de ligams suspèctes. Un còp que l’ordenador es estat infectat, se recomanda d’amortir l’aparelh e de lo desconnectar del ret.
 
 
La santat publica del Reialme Unit afectada
 
Per ara, se sap pas la portada exacta de la ciberataca. Los principals afectats son estats los espitals publics del Reialme Unit e qualques unas de las entrepresas espanhòlas mai importantas, mai que mai Telefónica, la societat màger de telecomunicacions.
 
Per çò qu'es del Reialme Unit, l’ataca informatica a blocat l’accès del personal espitalièr a lors ordenadors e an degut transferir los pacients urgents e las ambulàncias devèrs d’autres centres. I auriá agut un total de sètze espitals afectats, mas los mèdias britanics asseguran que las donadas dels pacients son pas compromesas.