Bandièra01 1180x150: País Invisible

Opinion

Cortetas a bodre…

Arribada del Torn femenin a Albi
Arribada del Torn femenin a Albi | AFP/Jeff Pachoud
Alan Roch

Alan Roch

Responsable de l’IEO-Aude. Contaire,escriveire, cronicaire (ràdio, premsa escrita). Afogat de rugbi de 13.

Mai d’informacions

Serai pas longanha per vos estipular aquesta cordelada de cortetas:

 

  • Escrivètz cartas postalas: La Pòsta qu’expliquèt qu’èra banca, agéncia telefonica, servicis a la persona e ne passi, fa ara publicitats per que los pichons manden una carta postala a la mameta ! Retorn al còr del mestièr primièr ! Los pichons calandrons s’arregalaràn d’escriure: “M’amusi plan ! Mangi plan ! Potons”.

 

  • Sòuses a la banca: Una banca fa publicitat per çò que fa banca e non pas fornisseira de telefonilhets!

 

  • Cambiament de nom: En seguida de fusions, la Societat Generala se ditz ara SG. Sabi pas s’aqueste nom es sens garantida e s’aquò pòt enlevar l’enveja a una benda a Bonnòt modèrna d’anar voidar sos còfres-fòrts!

 

  • Al caumatge: Èra pas brica normal que per defendre l’escòla laïca de la Republica foguèsse un Papa que ne siague lo ministre de l’Educacion. Ara, las causas se passaràn atal-atal!

 

  • Cosina: Quand FR-3 passarà a l’occitan, probable que balharà l’animacion de l’emission de cosina al cap Maurin Saca: Maurin coma lo dels vins d’aperitiu e Saca coma la de las crompas al mercat!

 

  • Melon catar: L’autre còp, tornèt dins un vilatge d’Aude la fèsta del melon catar. Lo sol problèma es que jamai de lor vida los catars vegèron un melon que la curcubitacèa arribèt sègles mai tard dins la contrada!

 

  • Apellacion: Lo govèrn interditz als vins de la Region Occitania de se dire: “Sud de France”. Los vinhairons protèstan, alara qu’es una plan bona novèla: la fin de nòstra dependéncia.

 

  • Èrbas de Provença: Las làmias an descobèrt las sabors de las èrbas de nòstras contradas: es pr’aquò que s’acèrcan de las costièras de la Mar nòstra.

 

  • Prononciacion: Alara que plan de monde nos entantarinan amb nòstras “a” que se dison “o”, los jornalistas esportius capitèron en mens de tres setmanas de prononciar corrèctament lo nom del danés del malhòt jaune Vingegaard (amb doas a: son mai rics qu’en çò nòstre dins aquel país?) que se ditz quicòm coma Vingegòrd !

 

  • Recompensa ecologica: Al nom de la desfensa ecologica e environamentala e per la reduccion de l’emprenta carbona, es logicament que lo PDG de Total foguèt fait chivalièr de la legion d’onor dins la promocion del 14 de julh (dimenjada propicia als taps e a la bona chifra d’afar de l’entrepresa).

 

  • Vocacion: Cal èsser president a l’Elisèu per imaginar que la vocacion de Canaquia es d’èsser França dels caps als pès.

 

  • Pas de preson: Pas de detencion provisòria pels policièrs. Del politic, del judiciari e del policièr, qual es lo mèstre? La polícia aplica la lei: li cal pas se metre aldelà de la lei

 

  • Consciéncia professionala: Lo ministre de la Justícia se fa inculpar per poder conéisser de prèp totes los gràs de sas competéncias.

 

  • Sens cadièra: Se sap pas se lo Sanchez tornarà trapar son fautuèlh de primièr ministtre espanhòl. Per l’ora, an escapat al retorn dels rèire-filhs franquistas al govèrn, mas la seguida va èsser plan complicada. Òu, Puigdemont, perdequé aquel sorrire sus ta cara d’exilhat?

 

  • Espandi parisenc: Per çò que se faràn unas manifestacions dins quauquas vilas de provincia, nos explican que los Jòcs olimpics de París son los Jòcs olimpics de França. De segur, dins la mesura ont anam encara pagar de nòstra pòcha per aquela vila-lum que lo monde entièr enveja.

 

  • Sens equivòca: Nos an oblijats de nos destibar de l’Estivada. En signe de protèsta, es possible de s’anar tibar (amb moderacion – o exageracion?) al Juranson a l’Hestiv’Òc!

 

  • Occitanista finòt: A l’arribada del Torn de França femenin a Albi, mercé a un brave margue long e flexible, un occitanista finòt capitèt de faire ondejar la bandièra occitana al bèl mitan de la linha d’arribada. Òsca !

 

Cortet Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: Comuna de Tolosa

Comentaris


I a pas cap de comentari

Escriu un comentari sus aqueste article