Lo demoràuem en noveme mès non auem agut enquia hereuèr. Fin finau qu’ei apareishut eth prumèr disc d’Alidé Sans entitolat Eth paradís ei eth tu. Era musiciana aranesa que presentèc aqueth prumèr trabalh dimenge passat en Barcelona en encastre deth hestenau Barnasants. Er album que rebat es situacions dera vida vidanta que mos amien a meditar sus es nòstes vides damb eth punt d’enguarda, eth vam e era ingenuïtat d’ua gojata occitana de vint ans.
 
Totes es cançons der album, mens ua, son composicions pròpries interpretades damb fòrça e damb vam, damb ritmes qu'arrebremben a viatges eth reggae, era rumba o eth soul, laguens un estil qu'era cantaira non gause definir pr’amor qu’ei solament “quauquarren que me ges de laguens”, segons çò qu’era madeisha declarèc a Barcelona TV.
 
Ua cançon deth disc ei tradicionau, se tracte d’ua version fòrça personau des Caulets, segons era sua version aranesa. Aqueth tèma, era cantaira que l’a enregistrat damb era collaboracion de bèri escolans d’occitan de l’Isla de Baish (Savés) que son: Sophie Monteil (piano), Lisa Fraresso (flaüta traversièra), Edith Seguier (percussions), Anaïs Gaux (votz) e Antoine Finos (baisha).