Bandièra01 1180x150: Comuna de Tolosa

editorial

En 2019, festegem lo seten anniversari de Jornalet

Lo numèro sèt nos agrada. D'un caire, trobam las originas de la lenga occitana dins un territòri qu'a la fin de l'Empèri Roman èra administrat per la Diocèsi de las Sèt Províncias (Dioecesis Septem Prouinciarum en latin). D'autre caire, una estela de sèt rais es ara lo simbòl que completa lo drapèl nacional al costat de la crotz occitana. Aquel simbòl representa las sèt províncias occitanas segon Francés Fontan. Es tanben e a l’origina l’estela del Felibritge, lo movement amb sèt fondadors que se creèt a la fin del sègle XIX a l’entorn de Frederic Mistral per organizar la salvagàrdia e la promocion de la lenga e la cultura occitanas amb un  programa patriotic, lingüistic e literari. E mai uèi sián sièis, lo Felibritge s’organizèt longtemps en sèt mantenenças.
 
En 2019, Jornalet aurà complit sèt ans e nos agradariá fòrça de consagrar tota aquesta annada a celebrar lo seten anniversari amb nòstres legeires, mai que mai amb tot aquel mond que nos an donat lor sosten.
 
 
Una revista de papièr e de concorses literaris
 
D'un caire, volèm menar a bon tèrme de concorses literaris: lo de las minutinas e lo prèmi al melhor article d'opinion. D’autre caire, publicarem a la fin de genièr una revista de papièr que contendrà una seleccion dels melhors articles de 2018.
 
 
De presentacions per Occitània tota
 
Avèm tanben pensat d'èsser presents per Occitània tota. Avèm un fum d'idèas e tanben d'enveja per collaborar amb los eveniments occitanistas del país, e doncas sètz pregats de nos escriure e de nos prepausar d'organizar una presentacion, una conferéncia, un rescontre de legeires o qué que siá en cò vòstre, o de nos convidar a participar activament a un eveniment qu'auretz organizat.
 
 
Convidatz-nos a venir
 
Per aquela rason, dins aqueste editorial fasèm una crida als que nos legisson al país. Basta d’organizar un rescontre, s’es possible amb una velhada, e nos ofrir un lièch per dormir una nuèch. Escrivètz a info(a)jornalet.com e nos metrem d’acòrdi  per lo luòc e la data.

 

 
  
fffff fffff
 

Participatz al concors de minutinas de Jornalet

Ongan, a l'ocasion del seten anniversari de Jornalet, lançam un concors literari sul genre literari imaginat per Joan-Marc Leclercq: la "minutina". S'agís d'un tèxt que deu far a l'entorn de 300 mots per que se pòsca legir dins l’espaci d’una minuta, dins un estil literari e romanesc.
 
Reglament del concors:
 

— Participants: lo concors es dobèrt a la participacion de totòm.
 
— Caracteristicas: las òbras presentadas devon èsser literàrias e dins un estil literari e romanesc. La longor minimala es de 285 mots e la maximala es de 315 mots, sens inclure lo títol. Las òbras devon èsser escrichas en occitan.
 
— Presentacion: cal presentar las òbras dins un format de tèxt numeric (.doc, .docx, .rtf, .odt...) e las cal mandar per e-mail a minutina@jornalet.comacompanhadas d'un imatge.
 
— Exposicion al vòte public: tanlèu que la redaccion de Jornalet aurà recebudas las òbras, se publicaràn sul sit: jornalet.com/minutina. Aquí, lo public poirà votar en avalorant cada tèxt entre 1 e 5, en clicant sus una de las estelas que se tròban sus l'imatge.
 
— Verdicte: lo verdicte de la jurada serà sens apelacion mas, ça que la, la jurada s'engatja a verificar la qualitat de l'òbra mai votada pel public. Lo verdicte se rendrà public a l'ocasion de la fèsta de Sant Jordi.
 
— Prèmi: lo concors ten pas cap de dotacion financièra, mas se remetrà un trofèu a l'òbra ganhanta, que serà publicada dins l'edicion en papièr de Jornalet de 2019 e tanben serà enregistrada en àudio per sa difusion radiofonica.
 
 
 
  





abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

ltrobat
8.

Quan ei de paréisher la revista de papèr deu Jornalet?

  • 0
  • 0
pjm pjm
7.

#6 dens lo cas de Jornalet, se parla pas d'abonament, meilèu de quèsta.

  • 7
  • 10
glück
6.

Lo Jornalet es una escomesa de cada jorn. Òsca e longamai ! Per 2019 seriá plan de botar en plaça una formula d'abonament de sosten per aportar al jornal un revengut regulièr e lo desvolopar.

  • 14
  • 0
Beatritz Darroques Fois
5.

#4 Arrestatz de far lo TRòL e contactatz dirèctament la redaccion de Jornalet s'avètz de problèmas amb las informacions catolicas, islamoesquerristas. A ieu personalament m'interessa çò que se passa a Lorda.

  • 11
  • 5
PRO D2 BAIONA IS NOT VATICANO
4.

Per 2019 podem esperar un entrevIsta de Frances lo cap deus crestians. Aquiu si n es pas catolic qu es jacobin qu es la linha editoriau. Sera possible tanben una entrevIsta deu curat Barbarin apres la fin de son jutjament? Com aquo podra explicar lo foncionament de la gleisa dab los drolles.

  • 3
  • 14

Escriu un comentari sus aqueste article