Bandièra01 1180x150: Comuna de Tolosa

editorial

Quis custodiet ipsos custodes?

Lèu començarà la quatrena setmana del jutjament dels independentistas catalans, un procès que se mòstra de mai en mai politic e arbitrari. Coma ditz Gerard Joan Barceló dins sa tribuna d’aqueste dissabte passat, sembla ben “una parodia de justícia, ont un partit dubèrtament racista, masclista e franquista vòu acusar a costat dau ministèri public e de l’Estat de democratas d’èstre de criminaus organizats e lei desiran embarrats per cinquanta ans”.
 
Los observaires internacionals d’International Trial Watch an mostrat lor estonament davant la “carga politica” que la ten la procedura en soslinhant que los procuraires pausan de questions als acusats a prepaus de lor militància politica o associativa... de questions que, segon los observaires, “mancan dirèctament a de dreches fondamentals coma los de reünion, associacion e libertat d’expression”.
 
Justament, totes los acusats an plangut dins lors declaracions que sián violats lors dreches fondamentals, del temps qu’an demostrat qu’an totjorn agit pacificament e democraticament. Mentretant, de procuraires agressius “citan de twitterejadas inexistentas, ò repròchan ais acusats non pas seis escrichs, mai de messatges recebuts ò de respònsas de fiuladas de Twitter, de còps sensa lei mostrar ò en inventant lo nom de seis autors”.
 
Lo president d’Òmnium Cultural, Jordi Cuixart, declarèt al tribunal que sa prioritat “es pas de sortir de preson”, ont es embarrat dempuèi 502 jorns, mas de “denonciar l’atac contra las libertats”.
 
Quant a las declaracions dels testimònis, cal soslinhar las dels responsables del govèrn espanhòl de 2017, la vicepresidenta, Soraya Sáenz de Santamaría, lo president, Mariano Rajoy, e lo ministre de l’Interior, Juan Ignacio Zoido. Los tres se jutgèron pas responsables de las violéncias policièras contra lo mond que votavan en Catalonha lo 1r d’octòbre de 2017. E mai mandèsson mila policièrs en Catalonha en despensant 87 milions d’èuros, diguèron que ne sabián pas res, del temps qu’acusavan los independentistas catalans d'èsser responsables de la violéncia.
 
Dotze democratas clarament pacifistas jutjats, de procuraires agressius, l’ultradrecha manifèstament franquista coma partida civila e un jutge president de l’audiéncia que son imparcialitat es mesa en question.
 
Eles volián èsser jutjats en Catalonha e en catalan. Los an menats a Madrid, davant un tribunal de darrièra instància, lor an refusada la traduccion simultanèa. Es aital que los procuraires jògan a l’ostal amb un arbitre qu’es de la meteissa esquipa.
 
Dins sa declaracion, Raül Romeva afirmèt que tot èra un afar politic, e qu’èra la tòca del govèrn espanhòl d’acceptar lo dialòg amb Catalonha. Atal diguèt al jutge: “Se sèm uèi aicí, es pel fach que los que devián far de politica a l’epòca o faguèron pas e vos passèron a vosautres, los tribunals, la responsablitat de respondre a una question que los concernís a eles. Per tant, ieu vos demandi umilament, onèstament, que tornetz aqueste dorsièr, e mai s’es incomòde, aquí d’ont deviá èsser pas jamai partit, çò es sus l’escaquièr politic”.
 
Après tres setmanas de procès, la redaccion de Jornalet podèm afirmar que lo sol delicte qu’avèm vist, es lo de jutjar aqueles òmes e aquelas femnas. Sembla qu’aquel sentiment siá partejat per una granda partida de la societat catalana que seguís cada jorn lo jutjament. “Sètz sòci d’Òmium Cultural?” es una de las questions que los procuraires an pausadas a cadun dels acusats. D’aquel temps, Òmnium Cultural a ganhat mai de 4000 membres nòus. A l’ora d’ara n’a mai de 145 000.





 
 

 

 


 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Abram Auvèrnha
4.

Faciar una pena de vint ans de preson en tot damorar dreit coma aquò... Quna dignitat !

  • 11
  • 0
Franc Bardòu
3.

Dotze democratas clarament pacifistas jutjats, de procuraires agressius, l’ultradrecha manifèstament franquista coma partida civila e un jutge president de l’audiéncia que son imparcialitat es mesa en question ? Quand los procuraraires e jutge parcial n'auram acabat amb lo jutjament de carnaval contra los elegits democratics pacifics del pòble de Catanlonha, poiràn venir jutjar los Gilets Jaunes arrestats en França per delicte d'opinion, eles tanben. Qué pòt fa que los jutgen en castilhan ? De tot biais, seràn eles, sempre, qu'auràn rason…

  • 12
  • 2
Mèfi! 31
2.

#1 de legir "etnica"

  • 1
  • 0
Mèfi! 31
1.

Opinion politica e opinion geopolitica
En maitas democracias, tot se passa atal coma se una opinion geopolitica fosquèsse pas politica, et que la libertat politica s'arrestèsse abans la libertat geopolitica.
Dins l'opinion, la situacion geopolitica es un eiretatge istoric, de conquistas e d'alliganças, e es considerada coma un fait intangible, irréversible, levat d'unes cases de colonizacion e d'opression etica.

La libertat geopolitica es una libertat collectiva, e pregondament politica.

  • 3
  • 0

Escriu un comentari sus aqueste article