Bandièra01 1180x150: Comuna de Tolosa

editorial

Mobilizem-nos totes lo 10 d’octòbre que ven

Lo collectiu nomenat Per Que Viscan Nòstras Lengas, qu’amassa las diferentas associacions d’ensenhaires de las lengas autoctònas e minorizadas de l’estat francés, crida a manifestar lo 10 d’octòbre que ven davant los rectorats, prefecturas, sosprefecturas
Lo collectiu nomenat Per Que Viscan Nòstras Lengas, qu’amassa las diferentas associacions d’ensenhaires de las lengas autoctònas e minorizadas de l’estat francés, crida a manifestar lo 10 d’octòbre que ven davant los rectorats, prefecturas, sosprefecturas | Collectif Pour Que Vivent Nos Langues
La rintrada escolara es arribada fa qualques setmanas dins una pandemia que nos a fach minimizar los problèmas que las familhas afrontan cada mes de setembre: la coabitacion de la vida al trabalh amb la vida en familha, los oraris escolars e las activitats extrascolaras, los manuals escolars, l’abilhatge nòu, los vestits d’espòrt e, dins fòrça cases, demandar d’ajuda als grands...
 
En mai de tot aquò, las familhas occitanas an trobat ongan pus insuportable que jamai lo grèu problèma que se presenta a cada rintrada, es a dire l’escolarizacion dels enfants del país dins la lenga del país. L’etnocidi que patissèm dempuèi longtemps fa venir aquela causida legitima de mai en mai minoritària e en defòra de la normalitat e obliga los parents de far longs desplaçaments e de balhar d’explicacions a la familha e als amics. Coma se tot aquò foguèsse pas pro, l’enena reforma escolara que l’impausa París mena implicitament a la desaparicion completa de l’ensenhament de l’occitan, qu’èra ja dins una situacion de precarietat pietadosa.
 
Nos trobam dins aquesta situacion los occitans e d’autres pòbles governats per la Republica Francesa. Es per aquela rason que lo collectiu nomenat Per Que Viscan Nòstras Lengas, qu’amassa las diferentas associacions d’ensenhaires de las lengas autoctònas e minorizadas de l’estat francés, crida a manifestar lo 10 d’octòbre que ven davant los rectorats, prefecturas, sosprefecturas... Se farà lo meteis jorn per totas las lengas a l’ocasion de la jornada europèa de las lengas. Cridan a la mobilizacion los diferents collectius d’ensenhaires dels país, la FÈLCO, Calandreta etc. La redaccion de Jornalet tanben cridam a manifestar nombroses e exigir un cambiament de las politicas lingüicidas de l’estat francés.
 
Mentretant, encoratjam totes los collectius a denonciar la situacion que patissèm als organismes internacionals que defendon los dreches lingüistics e las minoritats. Tant que demorarà un sol occitanofòn sense drech a l’escolarizacion dins sa lenga, serem un pòble menaçat e secutat.

 
 
abonar los amics de Jornalet

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gèli Grande Lairac en Agenés
4.

Vaqui lo comunicat de sosten del Partit de la Nacion Occitana per l'accion del 10 d'octòbre de 2020.

http://lo.lugarn-pno.over-blog.org/2020/09/per-que-viscan-nostras-lengas/pour-que-vivent-nos-langues-10/10/2020.html

  • 0
  • 1
Franc Bardòu
3.

"Efectivament, lo pièger es a venir quand se considerarà que la pedagogia de las lengas vivas es pas mai adaptada a l'occitan vengut lenga mòrta". Non pas simplament "mòrta" : assassinada !

  • 0
  • 0
Refastigat
2.

Escrivon dins aqueste article :
"las familhas occitanas an trobat ongan pus insuportable que jamai lo grèu problèma que se presenta a cada rintrada, es a dire l’escolarizacion dels enfants del país dins la lenga del país."
Ieu auriá parlat puslèu dels parents d'escolans acarats a l'ofèrta, diversificada o estequida, d'opcions.
Cal causir entre ping-pong, rugbi, teatre, audiovisual... e quand l'opcion d'occitan es suprimida, se'n mainan pas totjorn.
Sols los occitanofils seràn còrferits.
Quant als dròlles, al collègi lor causida depend de la dinamica de l'establiment, mas tanben dels conselhs de parents nostalgics d'un temps que tornarà pas, mas que voldrián far conéisser a lor mainatge.
Tot còp l'estrambòrd s'atuda lèu fach, se lo professor es tròp forastièr al dialècte local... e l'annada d'après : anglés refortit per tot lo monde !
Al licèu es diferent, lo jove cèrca la bona estrategia per las bonas nòtas e per l'opcion facila.
Lo seu pensament pel bac motiva una part de sas causidas.
Vòli dire, per far cort, qu'un aprenent es rarament un militant.
Alara pels escolans occitanistas qu'an la fe, son peras d'un autre panièr ! Plan sovent son dins de grops mesclats ont los començants maganhan e los confirmats trepejan. Tanplan pendent plusors annadas.

Cresi pas brica dins mon comentari de m'èsser fòrça alunhat de l'argumentacion de l'article.
Òc, tot es fach administrativament per poirir la situacion e descoratjar lo monde.
L'estatut d'aquel ensenhament es pas bon, e lo temps jòga en favor de son eradicacion.
Efectivament, lo pièger es a venir quand se considerarà que la pedagogia de las lengas vivas es pas mai adaptada a l'occitan vengut lenga mòrta.



  • 0
  • 0
Portugaliza Pau
1.

On i a aplecs per la lenga?

  • 4
  • 0

Escriu un comentari sus aqueste article