Dins l’editorial d’aquesta setmana vos volèm mercejar per totes los dons e los messatges de sosten e de reconeissença per l’òbra que fasèm amb Jornalet. Los messatges d’aquela mena se son multiplicats aquestes darrièrs jorns e cal dire que nos pòrtan lo vam que nos cal per contunhar de trabalhar. Es pas un prètzfach aisit. Rescontram de dificultats de tota sòrta. Mas o fasèm amb tota la professionalitat e tot l’amor que podèm.
 
Totun, volèm ben remarcar que Jornalet es sonque una petita pèira d’una grand ostal que se bastís collectivament. Aqueste quotidian en linha seriá pas estat possible sens lo trabalh prealable del CLO, de la Wikipèdia en occitan, de la FIMÒC, de La Setmana, de Ràdio Occitània, Ràdio País, Ràdio Lenga d’Òc e tantas autras ràdios occitanofònas del país... Tanben de l’IEO, de la Chambra d’Òc, dels estanquets, dels forums d’Internet, etc. A l’ora d’ara, poiriam pas trabalhar sens los espleches del Congrès Permanent, ni sens lo sosten ni l’òbra del CIRDÒC, de Calandreta, de la FÈLCO, e d’Adishatz e Macarèl que nos an fòrça ajudats a espelir. De mençonar, enfin, los acòrdis de collaboracion internacionals amb Vilaweb, Nationalia, 7Seizh...
 
A mai, Jornalet seriá pas possible sens las collaboracions dels legeires, dels opinants, de las escòlas, de totes los que mandan d’articles, que los partejan suls rets socials, dels que ne parlan, dels que los fan servir... e tanben dels que lo critican e nos mandan de proposicions que nos ajudan a nos melhorar.
 
Jos lo lèma “legís, pensa, escriu”, lancèrem aqueste jornal fa un pauc mai de nòu ans amb l’idèa que foguèsse participatiu. Sèm contents del retorn, de las contribucions, de las criticas, dels comentaris, de l’ajuda... Mercés plan!