Bandièra01 1180x150: País Invisible

editorial

Cal de Jòcs Olimpics?

| Jean-Christophe Bott (EPA)
Es de mal creire lo que ditz qu’es pas racista pr’amor qu’a un amic negre mentre que contunha de manifestar d’actituds xenofòbas. Tal es lo sentiment qu’avèm en veire que China a mes endavant una esportiva oigor coma portaira de la tòrcha olimpica. En plen conflicte diplomatic sus la situacion dels oigors, lo gigant asiatic a pas anonciat cap de concession a las revendicacions d’aquel pòble, mas a passejat un esportiu oigor dins la pèça centrala de la ceremònia d’inauguracion dels Jòcs Olimpics d’ivèrn.
 
E aital an començat los primièrs Jòcs Olimpics d’ivern sens nèu. En plena emergéncia climatica, los jòcs d’ongan son los primièrs que se fan exclusivament amb de nèu artificiala. L’organizacion e lo comitat olimpic internacional an bèla assolidar que la nèu se produtz amb d’energias renovelablas, pasmens los expèrts del cambiament climatic son seriosament inquiets. “De far servir de grandas quantitats d’energia e de ressorsas per crear de nèu dins una zòna privada d’aiga es irresponsable. Dins aquel sens poiriam portar los Jòcs Olimpics sus la Luna o Mart”, çò a dich Carmen Jong, professora de geografia de l’Universitat d’Estrasborg, segon çò que rapòrta Vilaweb. E ben, los imatges de las estacions d’esquí de Yanqing e Zhangjiakou semblan d’una autra planeta; solament i a de nèu dins los limits de las espròvas.
 
Al marge de tot aquò, convidam los legeires a chifrar se son vertadièrament de modèls d’esportivitat aqueles eveniments ont totòm es gropat per estats, jos una bandièra e un imne que qualques esportius senton pas quitament coma pròpris. Es lo cas de fòrça esportius catalans o bascos, e poiriá èsser estat lo cas dels esportius occitans s’aguèssem pas patit un procès maquiavelic d’alienacion.
 
Mentretant, en Aran, en Catalonha e mai en Aragon, se baton per una candidatura de Jòcs Olimpics d’ivèrn dins los Pirenèus en 2030. Una candidatura contestada per de rasons ecologicas, mas sustot perque se crenh una perpetuacion del modèl economic unic del torisme massís e de la consecutiva subresplecha del territòri que compòrta d’emplecs plan precaris, qu’es una de las causas màgers de la desoccitanizacion de la Val d’Aran.
 
La question que nos pausam ara es se los Jòcs Olimpics en general son vertadièrament quicòm de bon, o se benlèu seriá melhor de los tornar pensar o quitament abolir.
 
 
abonar los amics de Jornalet

 


 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lo gat
9.

#8

S’agís pas d’èsser grand o pichon, s’agís d’agachar çò que podem vèire, segur qu’avèm pas totas las informacions, nimai la valor dels contrats passats dins las rèire foganhas.

900 milhons es la vila de Montreal que n’en parla e n’en sap lo pretz li calguèc 30 ans per s’en tornar quilhar.

Sabem totis que lo CIO a sas exigencias, es el que causís……Es lo CIO que te fa rei o pas.

Sabem totis que lo CIO se far asaigar es pas lo sol.

Sabem totis que d’unis entrepresas fan de subre facturacion e que lo comitat olimpic dins cada país n’en fa tanben.

Sabem totis que quora es l’argent de l’estat, es a diser lo nòstre, degun agacha a las despensas, me diretz que par fransa avèm pa smestier dels JO per aquò far.

Sabem totis que l’atribucion, o pas dels jòcs a un país es una longa negociacion.

Sabem totis que per 2024 Paris èra la sola vila de voler los JO.

Sabem totis que los comitats olimpics an mai que tròp una vistada subre dimencionada e que cada còp los budgets prevezit son a multiplicar per 2,3,4,5 eca..

Sabem totis que los jòc son per promòure una vila, un país, e detras una ideològia.

Vos convidi d’agachar e de plan espepissa los Jòcs de Beijing, la sorna festa que ça dison
De que pensar del jornaliste de la television dels país bàs que se far sortir de dabans la camerà per un agent del servici Chinés. Benlèu disiá quicòm que conveniá pas…
https://www.programme-tv.net/news/sport/293393-jo-de-pekin-la-video-choquante-dun-journaliste-interrompu-en-plein-direct-par-un-agent-de-securite/

Mas lo pòbla a besonh de jòcs, de Jòcs e de circ, non, ren n’a cambiat, costa mai car …

Doas questions de quant lo budget inicial pel JO de la vila parsi es despassat ?

De quant los jòcs de Paris saran deficitaris ?

Podem n'apondre una autra per quantas annadas anam èsser endeutats ?

Cossi los JO de Paris saràn pas rendables :
https://easynomics.fr/2021/06/01/jeux-olympiques-pourquoi-paris-2024-ne-sera-pas-rentable/

Per i vèire pus clar..
https://major-prepa.com/geopolitique/les-jeux-olympiques-une-si-bonne-affaire/



  • 1
  • 1
Emmanuèl Isopet
8.

#7 Soi pas un grand economista, mas quand disèm 900 milions de perdas, son pas 900 milions perduts per tot lo monde... Se d'unes son en deficit (l'organizator, l'estat...) d'autres an encaissat. E coma o notatz per Beijing 2008, i a la propaganda qu'es servida, e aquò a pas de prètz per d'unas entrepresas o d'unes estats.
Se parlatz de las installacions que servisson sonque un mes, cal pas doblidar que d'entrepreneires las bastiguèron e foguèron pagats. Es un deficit, una perda, per aquel que paguèt (lo contribuable pecaire!), un problèma ecologic tanben (sovent), mas pas per tot lo monde...
Pòdi afortir, sens gaire de paur, que se los JO èran pas rentables al nivèl economic e de l'imatge, per las entrepresas e los estats que finàncian, existirian pas mai dempuèi longtemps. O alara serian demorats una pichona competicion d'elèits esportius amonedats, coma o èra a la debuta.
Segon vos, l'objectiu es "far d'espectacle", òc-ben. Mas l'espectacle, per tant deficitari que foguèsse, s'es renovelat es qu'a una rentabilitat (economica, politica...). Se cal remembrar del famos "panem et circences" qu'aroinava de familhas de senators per la sola glòria del nom e del pòste politic (e dels avantatges derivats).

  • 7
  • 0
Lo gat
7.

#6

« Los JO actuals son efectivament una organizacion que son objectiu es de far de moneda »
Que çà disetz !

Rebecarai : non pas ! Los JO actuals son per far d’espectacle e far d’espectacle mondial còsta car.

Atal dins los jòcs olimpics passats avèm :

Montréal ambe 900 milhons de perdas

Los Angeles 1984 es estat pagat per lo privat

Atlanta 1996 es lo bon eisemple de siègre

Athena 2004 lo grand desgalhament public, la pachacada dins sa refofenta resplandor

Beijing 2008 una operacion per la grandor de China a 42 Milhards..

Atal la tièra poriá èsser longa….

Las retombadas economic son una legenda, n’i a cap de retombadas economics e plan sovent los forniments botats en plaça son daissats ermanesits auràn servís un mes !

Rendables los jòcs olimpics ?
Pensi pas es sonque una operacion de promocion, per una vila per un país, cal tanben pensar asaigar aquel mond del CIO, es pas balhat….

Segur caldriá tornar vèire tot aquò, d’un biais mai sanitós çaquelà.

  • 1
  • 0
Emmanuèl Isopet
6.

Los JO actuals son efectivament una organizacion que son objectiu es de far de moneda (o èra pas tant 100 ans fa, mas la mediatizacion dins un monde capitalista...).
Los JO son efectivament un imne al nacionalisme: la pròva es l'usatge e la règlamentacion a l'entorn dels imnes e de las bandièras. En defòra dels estats oficialament reconeguts per l'organizacion, tot es interdich. Soi segur qu'en defòra dels bascos o dels catalans, i a tot plen d'esportius que son pas estacats mai qu'aquò als simbòls de lor estat e que lor agradarian mai d'ausir "imagine" o "eye of the tiger".
Organizar una competicion esportiva amb d'equipas occitanas o catalanas seria integrar aquelas identitat dins la competicion nacionalista, çò qu'ai de mal a veire coma un progrès.
Per memòria, los JO antics, malgrat la faciada religiosa, èran tanben un biais d'afrontament de las ciutats (amb los meteisses pb d'esportius qu'a la fin se vendian als mai rics).
Me sembla que la competicion esportiva es naturala en çò dels umans (dusca a un cèrt atge, per la màger part!) e probablament d'unes autres animals. Deven poirida e dangierosa quand es ligada a d'ideologias (nacionalistas, economicas...). Coma plan causas.

  • 9
  • 0
Òlo Pujòlo
5.

#4 alavetz?

  • 4
  • 0

Escriu un comentari sus aqueste article