Bandièra01 1180x150: País Invisible

editorial

Novèl sit web

Novèl sit web
Novèl sit web | pexels

Venèm d’inaugurar un novèl sit web per nos adaptar a las nòvas abituds de consum d'informacion dels lectors. Amb aquesta mesa a jorn se pòt accedir al contengut del quotidian d’un ordenador, d’una tauleta o d’un telefòn mobil e aver una lectura optimizada per cada ecran. A mai, Jornalet aprofiècha lo novèl imatge per cambiar son nom en quitant d’èsser una “gaseta occitana d’informacions” per venir un “quotidian occitan d’informacions”. Tanben avèm mes lo ponch final als comentaris anonims amb un sistèma de verificacion dels e-mails.

De bastir aqueste sit web nos a costat tres longas annadas, e n’avèm pagat sonque la mitat. Mercejam los tecnicians de nos lo daissar pagar dapasset del temps que fasèm una crida a totes los que nos poiràn e voldràn ajudar. De fach, d’arribar als onze ans d’informacions e opinions jornadièras en occitan amb de ressorsas precàrias es un miracle que l’a fach possible lo sosten popular, tant al nivèl economic coma amb son volontariat.

Tot aquò se fa tanben gràcias a d’acòrdis d’amistat e cooperacion amb d’autres mèdias,  que sián nacionals coma o foguèt La Setmana, o ben o son a l’ora d’ara Sapiéncia, Ràdio Lenga d’Òc, Nissa Pantai, Ràdio Occitània o Ràdio País, entre d’autres; o que sián internacionals coma o son mai que mai Nationalia e Vilaweb. Enfin, Jornalet prepausa a gratis e en accès liure son còrpus textual e audiovisual pel desvolopament de las novèlas tecnologias en occitan.

Esperam que lo nòu sit contribuirà a que se contunhe de legir, de pensar e d’escriure en occitan.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article