Bandièra01 1180x150: País Invisible

editorial

Per un labèl “Torisme Occitan”

Per un labèl “Torisme Occitan”
Per un labèl “Torisme Occitan”

L’estiu e las vacanças son per se pausar, s'espaçar, se distraire, escapar a las preocupacions del trabalh e gaudir del léser. La redaccion de Jornalet contunharà son trabalh mas un pauc mai pausadament: nos pausarem, mas sens que se pause lo fach de far viure l’occitan cada jorn. Per aquesta rason, volèm tornar prepausar quicòm qu’aviam ja dich qualques còps: far de torisme en Occitània.

E mai los viatges alonhats nos permetan de conéisser de nòvas culturas, lo torisme de proximitat pot ajudar a refortir la nòstra, que n’a de besonh. A mai, de conéisser plan un país tan grand coma Occitània se pòt solament far amb de temps, e las vacanças d’estiu son una bona escasença per o far. De vesitar la Val d’Aran, de s’espaçar en Peiregòrd, de virar pels Causses, de bronzar sus la còsta de Provença, de se passejar per las Valadas, d’agachar los volcans d’Auvèrnhe o de percórrer las Lanas son d’experiéncias pròchas que valorizam pas totjorn pro. Avèm pas besonh de tròp de jorns ni d’efectuar de grands desplaçaments, mas se cada estiu consagram qualques jorns a conéisser lo país nòstre descobrirem qu’Occitània es un país absoludament complet.

En mai d’aquò, de conéisser plan nòstre país es un acte de patriotisme occitan que deuriá èsser un fach normal. L’alienacion nacionala de nòstre pòble s’exprimís, coma o avèm sovent dich, a travèrs de la desconeissença del país, çò que nos mena a nos devesir e a assumir de referents exteriors a nòstra realitat. Dins aquel sens caldriá que los diferents responsables toristics regionals, los de las Valadas e de Torisme Val d’Aran pachèsson una estrategia promocionala conjoncha. L’union fa la fòrça, e un labèl “Torisme Occitan” provocariá, per se meteis, un cambiament de mentalitats.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Maël Clarmont
3.

Arrrg... Fau arrestar bei le torisme ! Iu que sèi naissut en Provença, sabe ben que quo-es una calamitat. E quo-es pas per çò que n'i marcat "occitan" dessobre que li tòrna melhor.

  • 5
  • 1
Gael
2.

"torisme" es pas qu'un autre nom per Colonisacion.
Daissem Occitània fòra d'aquò ...

  • 4
  • 14
LACHAUD
1.

Dins l'Aude, i a ben un label "pais catars" que se vai dins las charrieras e la publicitat. Pais catars, pais catars, pais catars, pais catars, rotissaria catara, libraria catara pertant quò fai pas avançar la coneissença sur l'istòria catara. M'es d'avis qu'avant de damandar un label, chaldria benleu pensar a cambiar de govern.

  • 9
  • 9

Escriu un comentari sus aqueste article