Bandièra01 capçalera  1180x150: Botiga

editorial

Companhs de Les e de Bossòst, de Salardú, de Vilamòs...

25u corsa Aran per sa Lengua, 2018
25u corsa Aran per sa Lengua, 2018 | Zep Armentano

Un an de mès, Aran ven tot un país en movement pera lengua e non podem sonque felicitar ath collectiu Lengua Viua pera sua determinacion pendent 29 ans e toti es ans que vieràn. Aguesta hita ei un testimòni dera constància entà promòir e revendicar er usatge sociau der aranés e dera lengua occitana en generau, qu’ei ua part fonamentau deth patrimòni culturau, uman e politic dera Val d’Aran.

Eth succès constant dera corsa Aran per sa Lengua ei un testimòni deth supòrt e dera passion qu'era comunautat aranesa a entà preservar e e refortir era sua identitat. En un mon de mès en mès globalizat, ei vitau d’arrebrembar era importància de protegir e promòir era lengua deth país.

Era corsa Aran per sa Lengua non ei solament ua plataforma entà sensibilizar sus er usatge sociau dera lengua mès tanben un moment de hè’c en comunautat, de hèr camin amassa e de partejar “un tròç de pan, un còp de vin, parlar deth temps damb eth vesin”.

Aguest prètzhèt non solament refortís era identitat dera comunautat aranesa, mès tanben pòrte energia e vam ara rèsta de territòris a on era lengua occitana patís ua situacion d’ultraminorizacion. Aquera energia que se transmet Garona enjós arribe cada an a mès còrs e son cada an mès es que trabalhen entà protegir, estimar, dignificar e emplegar era lengua.

Felicitacions a tota era còlha de Lengua Viua per sua dedicacion e supòrt e per hè’c damb amor en tot crear un eveniment transversau e conviviau qu’amasse a toti es aranesi. Podem díder qu’era corsa Aran per sa Lengua ei tot un eveniment màger en país. Demoram qu’eth trabalh infatigable de Lengua Viua servisque d’inspiracion ara rèsta deth territòri occitan.

Felicitacions encara un còp a toti es implicadi en aguesta grana iniciatiua. Era corsa Aran per sa Lengua ei ua mòstra dera fòrça d’un pòble comprometut damb era sua lengua e era sua cultura.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Zep Armentano País Invisible
1.

A jo tanben m'esmò cada viatge que Joan cante eth vèrs que hè: "Brembatz-vo’n plan deth praube Joan qu'estime plan era Val D'Aran". Pòdes enténer qu'ac dit deth hons deth son còr, e è era sensacion qu'eth sentiment puge cada an mès, deth còp qu'eth país languís e que mos hèm grani qu'era acuelhuda ei de mès en mès cauda. Non n'auetz cap de dobte, Joan, pensam tostemp en tu damb doçor.

  • 4
  • 2

Escriu un comentari sus aqueste article